“თავისუფლების კლუბი” ეს არის ორგანიზაცია, რომელიც ამსხვრევს სტერეოტიპებს, გვეხმარება არაფორმალური განათლების მიღებაში და აძლევს ახალგაზრდებს თვითრეალიზაციის საშუალებას. ჩვენ ვატარებთ გასვლით ტრენინგებს აჭარის ხუთ მუნიციპალიტეტში. ჩვენ ვუტარებთ თანატოლებს ტრენინგებს ჩვენთვის უკვე ნაცნობ თემებზე. მაგალითად, ისეთ თემებზე, როგორიცაა გენდერული თანასწორობა, ლიდერობა, შშმ პირთა უფლებები და სხვა. ვფიქრობ, ჩვენმა ტრენინგებმა შეცვალა ბევრი ადამიანის ხედვა, დაეხმარა მათ სხვადასხვა სირთულის დაძლევაში.
ჩემი პირველი ტრენინგი სწორედ “თავისუფლების კლუბში” ჩატარდა. ეს იყო გასვლითი ტრენინგი და საინტერესო თემაზე – “ფობიები და კომპლექსები”. ტრენინგის მსვლელობაში ვხედავდი როგორ იცვლებოდნენ მსმენელები, ისინი უფრო გაბედულები ხდებოდნენ. ერთ-ერთმა გოგონამ ამ ტრენინგზე აღმოაჩინა თუ რა პროფესიას სურდა დაუფლებოდა, რაშიც მას დაეხმარა საკმაოდ საინტერესო დავალება: ბავშვებს უნდა გაეკეთებინათ მცირე პერფორმანსი ფსიქოლოგსა და პაციენტზე. ამ გოგონას ფსიქოლოგის როლი ერგო, მართლაც კარგი პერფორმანსი გამოვიდა, ძალიან საინტერესო არგუმენტებით დატვირთული, საბოლოოდ აღტაცებული დავრჩით ყველანი. პირადად მე ამ ტრენინგის საშუალებით ბევრი მეგობარი შევიძინე და ბევრი რამ ვისწავლე.
ტრენინგების გარდა ბევრ სხვა აქტივობასაც ვახორციელებთ. ვიღებთ გადაცემებს სხვადასხვა თემაზე, რაშიც “თავისუფალ ჟურნალისტთა სახლიც” გვეხმარება. თითოეულ ჩვენგანს შეუძლია იყოს წამყვანი, გადაცემების მონტაჟსაც აქვე ვსწავლობთ, ვაკეთებთ რეპორტაჟებს, ხშირად გვყავს საინტერესო სტუმრები და ვიღებთ მნიშვნელოვან ინფორმაციებს. გადაცემები, ისევე როგორც ტრენინგები, ერთ-ერთი საუკეთესო გზაა ცნობიერების დონის ამაღლებისა და თავისუფლად საუბრისთვის.
არსებობს კიდევ ბევრი ორგანიზაცია, სადაც ასევე შესაძლებელია იყო მოხალისე. ბათუმში ხშირად იმართება ფესტივალები, რომლის ფარგლებშიც ასევე შეგიძლია გახდე მოხალისე. მაგალითად, არასამთავრობო ორგანიზაცია `ბორჯღალის~ მიერ ორგანიზებული თხრობითი პერფორმანსების ფესტივალში ახალგაზრდები საუბრობენ სხვადასხვა ღირებულებებზე, ან `დებატ კლუბი~, სადაც დებატების ხელოვნებას ვსწავლობთ. დარწმუნებული ვარ, რომ თუ გსურს იყო ჩართული სამოქალაქო ცხოვრებაში და გახდე მოხალისე, მრავალი არასამთავრობო ორგანიზაცია შეგიწყობს ხელს ამაში.
