„მოსახლეობას ვესაუბრეთ, შევთანხმდით რომ ხვალ, დღისით შევხვდებით და დავილაპარაკებთ დეტალებზე. თუმცა, აქვე უნდა აღვნიშნო, რომ ავტობანის მშენებლობის პროექტი დამტკიცებულია და შეთანხმებულია დონორ ორგანიზაციასთან. სოფლის გზისა და ცენტრალური მაგისტრალის ძველი შემაერთებელი მონაკვეთი უსაფრთხოების მიზნით გადაიკეტა. პროექტის მიხედვით სოფლის გზა მაგისტრალს გვირაბიდან 800-900 მეტრში შეუერთდება, რასაც 1 წელი მაინც დასჭირდება“ – განაცხადა „ბათუმელებთან“ სატელეფონო საუბარში საქართველოს საავტომობილო გზების დეპარტამენტის ტერიტორიული ორგანოს აჭარის საავტომობილო გზების დირექციის დირექტორმა ზურაბ სიხარულიძემ.
ამ ეტაპზე ქობულეთისა და ბათუმის ასაქცევ მაგისტრალზე [ავტობანზე] სამუშაოები ოჩხამურიდან სახალვაშომდე (ჩაქვის გვირაბამდე) მონაკვეთში მიმდინარეობს. აჭარის საავტომობილო გზების დირექციის ინფორმაციით, ამ მონაკვეთზე მშენებლობა 2013 წლის მაისში დაიწყო და 2016 წლის ივლისში უნდა დასრულდეს.
ავტობანის მშენებლობა. ჩაქვი, სახალვაშო [ფოტო; თედო ჯორბენაძე]
