მთავარი,სიახლეები

ვინ შეინარჩუნებს და ვინ ვერა სამსახურს ბათუმის მერიაში

04.01.2018 • 3310
ვინ შეინარჩუნებს და ვინ ვერა სამსახურს ბათუმის მერიაში

ბათუმის მერიას ცხრა სამსახური აქვს. ამ დროისთვის უფროსი აღარ ჰყავს ბათუმის მერიის არქიტექტურის სამსახურს. ამ სამსახურის უფროსის, ირაკლი ახალაძის მიერ გადადგომის შესახებ განცხადების დაწერის თაობაზე ინფორმაცია, დღეს დაადასტურეს ბათუმის მერიაში. ვაკანსია კეთილმოწყობის სამსახურის უფროსის პოზიციაზე კი მას შემდეგ გაჩნდა, რაც ამ სამსახურის ყოფილი ხელმძღვანელი თენგიზ პეტრიძე ბათუმის ვიცე-მერად დაინიშნა.

ირაკლი ახალაძის მსგავსად ხომ არ აპირებენ თანამდებობა პირადი განცხადების საფუძველზე დატოვონ სხვა სამსახურის ხელმძღვანელებმაც. ბათუმის მერიის საფინანსო სამსახურის უფროსი, არჩილ ვანაძე აცხადებს, რომ მისი გადაწყვეტილება დამოკიდებული იქნება იმაზე, თუ რეორგანიზაციის დასრულების შემდეგ როგორი სტრუქტურა ჩამოყალიბდება ბათუმის მერიაში. „ჯერჯერობით ვმუშაობ, დაველოდები სტრუქტურის ჩამოყალიბებას“, – უთხრა „ბათუმელებს“ არჩილ ვანაძემ.

„ჩემთვის არაფერი უთქვამთ, ჯერჯერობით ვმუშაობ“, – აცხადებს მერაბ ქიძინიძეც, განათლების, კულტურის, სპორტისა და ახალგაზრდობის სამსახურის ხელმძღვანელი.

ზაალ მამუჭაძე – ზედამხედველობის სამსახურის უფროსი კი ამბობს, რომ არ აპირებს გადადგომას. „ჯერჯერობით, ვმუშაობ ჩვეულ რეჟიმში“, – უთხრა მან „ბათუმელებს“. თუმცა, ბოლომდე  სიტუაციაში არც ზაალ მამუჭაძეა გარკვეული.

შიდა აუდიტის სამსახურის უფროსი, მამუკა დარჩია ამბობს, რომ, ჯერჯერობით, სურვილი აქვს და მუშაობს. „მომავალში რა იქნება ვნახოთ“. კითხვაზე, რომ გთხოვონ წასვლაზე განცხადებას დაწერთ? – პასუხობს: „ყველაფერ შეიძლება მოხდეს, მაგრამ ამის პროგნოზის საფუძველი არ მაქვს, რომ შეიძლება მოხდეს“.

რას აპირებს ბათუმის მერიის სამსახურების შორის ერთადერთი სამსახურის ქალი ხელმძღვანელი. შორის ჯანმრთელობისა და სოციალური დაცვის სამსახურის უფროსი სოფო მიქელაძე ამბობს, რომ „ჩვეულებრივად აპირებს მუშაობის გაგრძელებას“.

ქონების მართვისა და ეკონომიური პოლიტიკის სამსახურის უფროსი, გოგა ლომაძე ერთადერთია, ვინც არც სატელეფონო ზარებს პასუხობს და არც სმს შეტყობინებებს. მერიის საზოგადოებასთან ურთიერთობის სამსახურში კი აცხადებენ, რომ ამ ეტაპზე გოგა ლომაძეს თანამდებობა არ დაუტოვებია და მუშაობს.

წინასწარი ინფორმაციით, ბათუმის მერიაში არსებულ ვაკანსიები იანვრის ბოლოსთვის შეივსება.

იმ ფონზე, რაც ლაშა კომახიძემ რეორგანიზაცია დაანონსა, ბათუმის მერიის აპარატში თანამშრომლები, როგორც თვითონ აცხადებენ, გაურკვევლობასა და შემცირების მოლოდინში არიან.

ამ დროისთვის თანამდებობა უკვე დატოვა ბათუმის მერიის რამდენიმე აიპის ხელმძღვანელმა.

გადაბეჭდვის წესი


ასევე: