რას ლობირებს ხულოს, შუახევის და ქედის მაჟორიტარი ანზორ ბოლქვაძე საქართველოს პარლამენტში, როგორ აფასებს პრემიერის ქცევას, როცა მან ანზორ ბოლქვაძის კოლეგას და ყოფილ თანაპარტიელს შეაგინა და როგორ მოიქცევა თუ პრემიერი მას შეურაცხყოფს? – ამ და სხვა კითხვებზე ანზორ ბოლქვაძემ „ბათუმელების“ კითხვებს უპასუხა.
ბატონო ანზორ, ამ მოწვევის პარლამენტში რა საკითხებზე მუშაობთ?
ძირითადი სამუშაო იყო კონსტიტუცია, მეორე კი ბიუჯეტი ქვეყნისათვის და მთიან აჭარისთვის, სადაც მე ვარ მაჟორიტარი. ჩემს სამაჟორიტარო მუნიციპალიტეტებში ბიუჯეტში რაღაც მუხლები იყო დასაცავი, რაზეც დავაყენე წინადადებები. დავაყენეთ წინადადებები სხვადასხვა ინფრასტრუქტურული პროექტის დასაფინანსებლად. მთიან აჭარისთვის განსაკუთრებით მნიშვნელოვანია დაფინანსება პირველ კვარტალში, რადგან ზამთარია. არის საკითხები, რომლებიც ითვალისწინებს ინფრასტრუქტურული პროექტების განხორციელებას, ეს არის მოსახლეობის მოთხოვნები – ეს უკავშირდება გზას, წყალს და ასე შემდეგ. არის სოფლები, სადაც ითხოვენ ადმინისტრაციულ შენობას. აღარ ვილაპარაკებ იმ მუხლებზე, რომლებიც მთის კანონის დამტკიცების შემდეგ ამოქმედდა. დავსვი საკითხი, როგორც ბაგა-ბაღების ასევე აიპების თანამშრომლების ხელფასებზე, მათ ძალიან დაბალი ხელფასები აქვთ – პენსია შეიძლება უფრო მაღალია, ვიდრე მათი ხელფასები. ბიუჯეტში გათვალისწინებულია და ალბათ უახლოეს დღეებში განისაზღვრება რამდენი უნდა იყოს ნამატი. მინდა ეს საკითხი ჩემს სამაჟორიტარო მუნიციპალიტეტებში ყველგან ერთნაირად დარეგულირდეს.
ჩემი ძირითადი თემაა ასევე ის, რომ 15-20 წელია გასული, რაც ხე-ტყესთან დაკავშირებით მოსახლეობა დაჯარიმებულია და მინდა, რომ ამის ამნისტირება მოხდეს. გარდა ამისა, რა თქმა უნდა, არა აქვთ პენსიის სრულად დაყადაღების უფლება, მაგრამ ნაწილობრივ დაყადაღების უფლება ხომ აქვთ, აღარ აქვს მოსახლეობას იმის უნარი, რომ ეს გადაიხადონ.
მე იმას არ ვამბობ, რომ კანონდამრღვევს ხელი შეეწყოს, მაგრამ კანონით უნდა იყოს გათვალისწინებული, ვის და როგორ შეიძლება ამნისტირება შეეხოს. ამას ყურადღების მიქცევა და საქმის ბოლომდე მიყვანა სჭირდება.
დიახ, მხოლოდ საკანონმდებლო ცვლილებით შეიძლება ამის დარეგულირება.
თქვენ ხართ აჭარის მაღალმთიანი მუნიციპალიტეტების მაჟორიტარი პარლამენტში. რა ინტენსივობით ხვდებით მოსახლეობას, რა პრობლემებით მოგმართავენ?
როდესაც არ მიმდინარეობს სხდომები ყოველთვის ვხვდები მოსახლეობას, გუშინწინაც მქონდა შეხვედრა ქედაში. ეს არის მთა, თოვლი მოვა სტიქიაა, შრება – სტიქიაა. დღეს შეიძლება იქ არაფერი ხდება, მაგრამ ხვალ ისეთი თემა იყოს დასაგეგმი, რაზეც დღეს საერთოდ ვერ იფიქრებ.
ახლა ხულოს მერიასთან ერთად დაწყებული გვაქვს ბარაკების ათვისების საკითხი. ეს უნდა მივიყვანოთ ბოლომდე, ადამიანს ხულოშიც უნდა ჰქონდეს ნორმალური ცხოვრების პირობები. შეიძლება ყველაფერი ვერ აუწყო, მაგრამ უნდა ჰქონდეს ნორმალური სახურავი, შუქი და წყალი. ასევე ვმუშაობთ კოოპერატივების განვითარებაზე, რომელიც ხელს შეუწყობს მეცხოველეობას. მთიან აჭარაში ტურიზმი ვითარდება. მერიასთან ვისაუბრეთ ასევე პროფესიული სასწავლებლის გახსნაზე, რაც მოსახლეობის მოთხოვნაა.
რამდენია ხულოს ბიუჯეტი?
ხულოს ბიუჯეტია 8 900 000, მაგრამ შეიძლება წლის ბოლომდე 12 მილიონს მიაღწიოს. ვგულისხმობ, რა თქმა უნდა, ქონების გადასახადს და სხვა შემოსავლებიც არის. მაგალითად, ღორჯომის ხეობაში მილიონ 300 000 ჯდება ერთი პროექტი იმ ადგილის გასამაგრებლად, სადაც მეწყერი ვითარდება. ამ ტერიტორიაზე არესებული სახლებიც დაიმეწყრება. ხვალ-ზეგ უფრო ბევრი პრობლემა შეიქმნება, მზადაა პროექტი და ტენდერია გამოცხადებული. სტიქია, რომ განვითარდეს ყველა საქმეს გადაგადებინებს.
შუახევის უნივერსიტეტში კონტიგენტი იკლებსო, ხომ არ გაგიგიათ თქვენ ეს და ხომ არ დაინტერესებულხართ რატომ?
დიახ, ცუდია ეს თემა. მე ვიცი და შუახევში განათლების კომიტეტის თავმჯდომარეც იყო ჩამოსული მარიამ ჯაში. მეუფესთან გვქონდა შეხვედრა, პირობები არის იქ, მაგრამ ერთადერთი პრობლემა არის ის, რომ უნივერსიტეტს საერთო საცხოვრებელი არ აქვს. მით უმეტეს, რომ მოშორებულია ხულოდან და სხვა მუნიციპალიტეტებიდანაც. ყოველდღე „მარშრუტკით“ მოძრაობას სტუდენტი ვერ შეძლებს. კვება და ხელშეწყობა არის. ერთადერთი თემაა საერთო საცხოვრებელი.
ამას უნივერსიტეტის რექტორი ამბობს?
მე ყველასთან მაქვს შეხება, გამოკითხვებს ვატარებ – გზაზე მხვდებიან ახალგაზრდები, მანქანას ვუჩერებ ვეკითხები. მაინცა და მაინც დირექტორისგან გავიგო [ამბავი] ეს ჩემთვის არ არის მიზანშეწონილი. სხვა მხრიდან უფრო მეტ ინფორმაციას გაიგებ, ვიდრე ხელმძღვანელისგან. ბოდიში მომიხდია, სხვა მიმართულებით არ ვლაპარაკობ, მაგრამ მე რიგითებთან უფრო მირჩევნია შეხვედრა, ვიდრე დირექტორებთან.
როგორ შეაფასებთ პრემიერის ქცევას საქართველოს პარლამენტში, როცა მან თქვენს კოლეგას შეაგინა?
მოსაწონი შეიძლება არაფერი იყოს, მაგრამ… თვითონ პრემიერმა შეაფასა მისი სიტუაცია. გამობრძანდა და თქვა, რომ ეს აღელვების ნიადაგზე მოხდა და ბოდიშიც კი მომიხადა. მე იმაზე მეტი რა უნდა ვთქვა, მაგრამ ყოველ შემთხვევაში თეთრზე თეთრი უნდა ვთქვა და შავზე შავი, ბევრი რამე შეიძლება მოსაწონი არ იყოს, კახელი კაცია, გაიხუმრა და რა მოხდა.
თქვენ რომ გაგიბედოთ მსგავსი რამ პრემიერმა, როგორ მოიქცევით?
მაგიდა და სკამი იმიტომ არსებობს, რომ უნდა დაილაპარაკო. ეს თემები არსებობდა იმისთვის, რომ რაღაცა მოხვედრილიყო. გამოეყვანა მდგომარეობიდან პრემიერი, რაც მისთვის მომგებიანი იქნებოდა. ეს იყო მიზანი თორემ კრიტიკული კითხვები დღესაც დავუსვი, მაგალითად, საქართველოს ფინანსთა მინისტრის მოადგილეს. ხანდახან მოთმინებიდან შეიძლება ადამიანი გამოვიდეს, შეიძლება შენც დაგემართოს. მოზომილი და გაზომილი ყველაფერი არ არსებობს და მე იმედი მაქვს, რომ თავს ამის უფლებას არ მივცემ, პოზიცია იქნება თუ ოპოზიცია, უხერხულობაში ჩავაყენო და გინებით დავშორდეთ ერთმანეთს.
ვიცით, რომ პრემიერს აქვს თმენის ვალდებულება…
მე ვარ იმ გუნდის წევრი, რომელსაც ხელმძღვანელობს პრემიერი. რა განცხადებაც გააკეთა პრემიერმა, იმაზე მეტი რა უნდა გავაკეთოთ. ერთს გეტყვი ხუმრობით, ბიძაშვილი ჭიდაობდა, მალე დაბრუნდა და ვეკითხები, რატომ დაბრუნდი ასე მალე-მეთქი, ერთი მომიგეს ერთი წავაგეო, მიპასუხა. მერე დავფიქრდი, რომ თურმე ორივე წააგო, ჰოდა იგივე თემაა, ის წაგებული იყო თავიდან ბოლომდე, მაგრამ მისი მიზანი იყო, რომ დაესვა ყველა ისეთი შეკითხვა, რომელიც გააღიზიანებდა და ვიღაცა რაღაცას წამოიყვირებდა და ამას მოჰყვებოდა ჩოჩქოლი. ეს იყო ადრე დაგეგმილი თემა. არ მეშინია ამას ხმამაღლა ვიტყვი ყველგან. ჩხუბი თუ ატყდებოდა ის ქულას დაიწერდა. მთელმა საქართველომ იცის ეს და მაგაზე დროს ნუ დამაკარგვინებთ, სხვა რამე შემეკითხეთ.
ბატონო ანზორ, მთავრობის წევრების კომპანიები ხშირად იღებენ მაღალბიუჯეტიან დაკვეთებს სახელმწიფო სტრუქტურებიდან. თქვენი აზრით, გარიგებასთან გვაქვს საქმე?
მე ვარ სპეციალობით მშენებელი, მესამე მოწვევის დეპუტატი ვარ, ჩემს სამშენებლო კომპანიას დაესვა წერტილი და გაჩერდა. შეიძლება ვიღაცა ამბობს ანზორ ბოლქვაძე რაღაცას აკეთებსო…
ვიღაცის ნათქვამს არ გეუბნებით…
არ მაქვს ინფორმაცია მთავრობის წევრები რას აკეთებენ. მე ის ვიცი, რომ ქედა-შუახევ-ხულოში ეს თემა არ არსებობს. ვერ ვხედავ და რომ ვხედავდე არ დავმალავ, მივალ და ვეტყვი. მერი იქნება თუ საკრებულოს თავმჯდომარე ღიად ვეტყვი ამ თემაში თქვენ არ ბრძანდებით მართალი-მეთქი. არ მოვერიდები, მეტი რა გიპასუხო. რაც კანონიერია ის უნდა გაკეთდეს. უკანონობა თუ არსებობს, არსებობს მაგის სამსახურები და მიხედონ, აგებინონ პასუხი, გინდა მე ვიყო გინდა სხვა.
პარლამენტში ინიცირებული იყო კანონპროექტი იმასთან დაკავშირებით, რომ ქალების სექსუალური შევიწროვება სამსახურში, ქუჩაში… უნდა გახდეს დასჯადი, რას ფიქრობთ ამაზე?
არ დაწერ და საღამოს სახლში ხომ უნდა მიხვიდე, ქალბატონები ყოველთვის დაფასებულები არიან და მათ შევიწროვებაზე არავინ ფიქრობს. რაში გამოიხატება, რომ … მაგალითად ხულოში სოფლის წარმომადგენლები ძალიან ბევრი გვყავს ქალები, მზად არის მერი და საკრებულოც, რომ ხელი შეუწყონ. მე ვერ ვხედავ მათ შევიწროვებას, პირიქით.
ანუ მსგავსი პრობლემის შესახებ არ გსმენიათ?
ყურებზე ხელს ვერ ავიხვევ, მე ბევრი რამე მსმენია, მაგრამ ვხედავ რეალობა რაც არის და იმას ვლაპარაკობ. ვიმსჯელებთ მაგ პროექტზე, ჩვენ გვაქვს სხდომები და მივიღებთ ამ კანონპროექტს თუ ქვეყანას სჭირდება. რა პრობლემაა.
საქართველოში ბევრი ფიქრობს, რომ სახლში კაცია უფროსი. თქვენ როგორ ფიქრობთ?
რა ვიცი, ბრძანება არ მინახავს ეგ სად წერია, რომ კაცია ოჯახში უფროსი. ბევრი ვიღაცა რაღაცას ამბობს მასე ხომ არაა. მე ჩემს ოჯახში სულ მორჩილად ვარ და ქალბატონები არიან უფროსები, სტუმარ-მასპინძლობაში და შვილების გაზრდაში პირველები არიან და უფროსობა მეტი რაა ოჯახში.
მარტო მასპინძლობა და შვილების გაზრდა შეუძლიათ?
არა, სამსახურში და პარლამენტშიც პირველები არიან.
გურამ კაშიაზე მინდა გკითხოთ, საფეხბურთო ნაკრების ლიდერზე, მან ცისარტყელას ფერების სამკლაურით ითამაშა, რასაც საქართველოში დიდი განხილვა მოყვა. თქვენთვის რას ფიქრობთ ჰომოფიბიის წინააღმდეგ აქციაში მის მონაწილეობაზე?
გურამ კაშიამ ფეხბურთი ითამაშოს, მკლავზე რას იზამს მე არ ვიცი და არც მაინტერესებს. მისი აზრია და მას ჰკითხეთ. ბურთი გაიტანოს მოწინააღმდეგის კარში და საქართველოს ღირსება დაიცვას. რა მიაბეს მკლავზე მაგას არც ვაკვირდები და არც მაინტერესებს. მაგაზე ვერ გიპასუხებთ, შეიძლება ტელეფონი გამეთიშოს სოფელში მივდივარ.
რას ეტყვით ამომრჩეველს, რომელიც ფიქრობს, რომ ევროპასთან ურთიერთობით ქართველობას დავკარგავთ?
ქართველი კაცი ქართველობას არასდროს არ დაკარგავს.
