ნეტგაზეთი • RU

ვაკანსიები ბათუმის მერიაში, ქედის გამგეობასა და აჭარის მთავრობაში

 

საჯარო სამსახურის ბიუროს მონაცემებით, 4 ივნისისთვის, ბათუმის მერიაში 27  ვაკანსიაა, ქედის მუნიციპალიტეტში – 11, ხოლო აჭარის მთავრობაში ორი ვაკანსია. აღნიშნულ ვაკანსიებზე განცხადებების წარდგენის ბოლო ვადა 5-7 ივნისია. ბიუროს ინფორმაციით, ამ დროისთვის ქვეყნის მასშტაბით საჯარო სამსახურებში სულ 900-ზე მეტი ვაკანსიაა.

 

საჯარო სამსახურის ბიუროს ვებგვერდზე გამოქვეყნებული მონაცემებით აჭარის მთავრობის აპარატში მთავარი სპეციალისტის ორი ვაკანტური ადგილია: საერთაშორისო ურთიერთობათა და მასმედიასა და საზოგადოებასთან ურთიერთობის დეპარტამენტებში [ანაზღაურება თითოეულზე თვეში 1070 ლარი]. განცხადებების წარდგენის ბოლო ვადა კი 2015 წლის 6 ივნისია.

 

27 ვაკანსიაა ქ. ბათუმის მუნიციპალიტეტის მერიაში. ბიუროს მონაცემებით აღნიშნულ ვაკანსიებზე განცხადებების შეტანის ბოლო ვადა ხვალ, 2015 წლის 5 ივნისს იწურება. ბათუმის მერიაში ადმინისტრაციის სხვადასხვა განყოფილებებსა და სამსახურებს სჭირდებათ სხვადასხვა კატეგორიის სპეციალისტები. ვაკანტურია მერის წარმომადგენლების თანამდებობები კახაბრის, ბონი-გოროდოკისა და ბათუმის სამრეწველო ადმინისტრაციულ ერთეულებში.

 

11 ვაკანური ადგილია ქედის მუნიციპალიტეტის გამგეობაში. ამ ვაკანსიებზეც განცხადების წარდგენის ბოლო ვადა კი 2015 წლის 7 ივნისია. ვაკანტურია გამგებლის თანაშემწის ადგილი გენდერული თანასწორობის საკითხებში, ასევე გამგეობის შიდა აუდიტის სამსახურის მთავარი სპეციალისტის თანამდებობა;  მთავარი სპეციალისტის ვაკანსიებია წონიარისის, დანდალოს, ცხმორისის, დაბა ქედის, პირველი მაისის, მერისის, მახუნცეთის ოქტომბრისა და ზვარეს ადმინისტრაციულ ერთეულებში.

 

საჯარო სამსახურებში კონკურსში მონაწილეობის მისაღებად კანდიდატმა განაცხადი უნდა წარადგინოს ელექტრონული ფორმით საჯარო სამსახურის ბიუროს ვებგვერდზე  www.hr.gov.ge. კანდიდატები აქვე გაეცნობიან სამუშაოს აღწერილობას, წარსადგენი დოკუმენტების ჩამონათვალს და სხვა დამატებით ინფორმაციას.

 

საკონკურსო-საატესტაციო კომისიები საბოლოო გადაწყვეტილებებს ქულათა სისტემით, განცხადების წარდგენის ვადის დასრულებიდან სხვადასხვა [1-დან 3-თვემდე] პერიოდში მიიღებენ.

 

ნეტგაზეთის მასალების სხვა გამოცემებში გადაბეჭდვის წესი
თედო ჯორბენაძე