აჭარის მთავრობის აპარატის პრესცენტრის ხელმძღვანელის ნათია სირაბიძის ინფორმაციით, უკარინის მოქალაქეს ტატიანა ნესტერენკოს, რომელიც, როგორც თავად ამბობს, ბათუმში 28 აპრილს გაძარცვეს თაღლითებმა, უკვე შეხვდნენ მათ უწყებაში.
ნათია სირაბიძე: „ქალბატონს დღეს შეხვდა ჩვენი ერთ-ერთი დეპარტამენტის ხელმძღვანელი და ესაუბრა. ის თავის დაწვას ნამდვილად არ აპირებს. ჩვენც გვინდა, რომ მას დავეხმაროთ. დავპირდით, რომ კანონმდებლობის შესაბამისად ჩვენ მას დავეხმარებით. ახლა ის შემიძლია გითხრათ, რომ ბათუმის მერიამ მას გამოუყო თავშესაფარი და შევთანხმდით, რომ ხვალ კიდევ შეხვდებიან ჩვენი თანამშრომლები და კანონმდებლობით რაც შესაძლებელია, ყველაფერს გავაკეთებთ მის დასახმარებლად“.
ტატიანა ნესტერენკომ დღეს „ბათუმელებს“ განუცხადა, რომ სამართალდამცავები მისი პრობლემით არ ინტერესდებიან. მისი თქმით, ძარცვის ფაქტიდან თითქმის ერთი თვის გასვლის მიუხედავად, ის დღემდე არც კი დაუკითხავთ.
შინაგან საქმეთა სამინისტროს პრესსამსახურის ცნობით, ტატიანა ნესტერენკოს საქმეზე მიმდინარეობს წინასაგამოძიებო ღონისძიებები და მას უახლოეს დღეებში შს სამინისტრო დაკითხავს საქმესთან დაკავშირებით.
