Batumelebi | ჯანდაცვის მინისტრი შუახევის საავადმყოფოში მომხდარ ინციდენტზე ჯანდაცვის მინისტრი შუახევის საავადმყოფოში მომხდარ ინციდენტზე – Batumelebi
RU | GE  

ჯანდაცვის მინისტრი შუახევის საავადმყოფოში მომხდარ ინციდენტზე

 

შუახევში მომხდარ ფაქტთან დაკავშირებით ჯანდაცვის სამინისტროს რეგულირების სააგენტომ წინასწარი მოკვლევის პირველადი შედეგი გაასაჯაროვა. 5 მაისს შუახევის საავადმყოფოში 24 წლის დაჭრილი მამაკაცი მიიყვანეს, რომელიც გარდაიცვალა.  

 

დასკვნის მიხედვით, კლინიკაში არ იყო დაცული სანებართვო და ვალდებულებითი პირობები.

 

„კლინიკაში არ იყო დაცული რამდენიმე მნიშვნელოვანი სანებართვო და ვალდებულებითი პირობა, რამაც მკვეთრად გაზარდა რისკი (მე ჯერ ვერ ვიტყვი, რომ ეს კავშირში არის გარდაცვალებასთან) და შეამცირა ხარისხი გადაუდებელი მდგომარეობის მართვისა. კლინიკის მმართველ კომპანიას, „უნიმედ აჭარას“ ჰქონდა აღებული ვალდებულება, რომ გადაუდებელი მდგომარეობის დროს მათ უზრუნველეყოთ პაციენტების გადაყვანა უფრო მაღალი დონის კლინიკაში. ეს არ განხორციელდა. ჩვენ მთელი ქრონომეტრაჟი შევისწავლეთ. იმ პერიოდში ადგილზე იმყოფებოდა რაიონული სასწრაფო დახმარების მანქანა, რომელიც შეეძლოთ ასეთ შემთხვევაში გამოეყენებინათ და გადაეყვანათ ეს ადამიანი, რაც მისი გადარჩენის შანსებს გაზრდიდა. პაციენტის შესვლიდან მხოლოდ 40 წუთის შემდეგ არის გაკეთებული გამოძახება კატასტროფის მედიცინის ცენტრში, მანქანა მართალია დაუყოვნებლივ გავიდა, მაგრამ რომდესაც ადგილზე მივიდა, პაციენტი სამწუხაროდ გარდაცვლილი იყო,“ – თქვა საქართველოს ჯანდაცვის მინისტრმა დავით სერგეენკომ.  

 

მინისტრის თქმით, არ შესრულდა სანებართვო პირობებით გათვალისწინებული რიგი მოთხოვნები, რამაც რისკის ქვეშ დააყენა ქირურგიული და სამეანო პროფილის პაციენტების მოვლა.

 

უშუალოდ რამ გამოიწვია 24 წლის ახალგაზრდის გარდაცვალება, ამ თემაზე პარასკევს, 15 მაისს, პროფესიული განვითარების საბჭოზე დარგის ექსპერტები იმსჯელებენ.

 

ნეტგაზეთის მასალების სხვა გამოცემებში გადაბეჭდვის წესი
"ბათუმელები"