ბათუმის მერიის კეთილმოწყობის სამსახურის მონაცემებით, მერიის ბიუჯეტიდან დაფინანსებული ქვეპროგრამის ფარგლებში, 2014 წელს ქალაქის ტერიტორიაზე განხორციელდა 6550 ცხოველის [მიუსაფარი ძაღლებისა და კატების] დაჭერა-ტრანსპორტირება; გაუკეთდა ევთანაზია [ჰუმანური დაძინება ნარკოზით] 2785 ცხოველს; სტერილიზაცია, ვაქცინაცია და დაბირკვა -1890-ს, კასტრაცია, ვაქცინაცია და დაბირკვა კი – 1875 ცხოველს.
აღნიშნული სამუშაოებისთვის გასულ წელს ბათუმის მერიამ ქალაქის ბიუჯეტიდან 298 ათას 185 ლარი და 83 თეთრი დახარჯა. მომსახურება კი შპს „CEBEP”-მა გასწია. ბათუმის მიმდინარე, 2015 წლის ბიუჯეტიდან ანალოგიური ღონისძიებისთვის სპეციალური ქვეპროგრამა 200 ათასი ლარითაა დაფინანსებული.
„ღონისძიების [მაწანწალა ცხოველების გაუვნებლობა] ფარგლებში განხორციელდება მიუსაფარი და მაწანწალა ცხოველების მოვლა-პატრონობის ღონისძიებები, მათ შორის: 5000 ერთეული ცხოველის (მიუსაფარი ძაღლების, კატების) დაჭერა და ტრანსპორტირება; განხორციელდება ევთანაზია (ჰუმანური დაძინება ნარკოზით, გადაუდებელი აუცილებლობით გამოწვეული), სტერილიზაცია, ვაქცინაცია და დაბირკვა, კასტრაცია“ – აღნიშნულია მერიის ქვეპროგრამაში.
