პრობლემები დიდთოვლობის გამო აჭარის მაღალმთიანეთში

შუახევის მერის, ფრიდონ ფუტკარაძის ინფორმაციით, ელექტროენერგიის ცენტრალური ხაზის დაზიანების გამო შუახევის მუნიციპალიტეტს ამ დროისთვის შუქი არ მიეწოდება, რაც შეეხება საავტომობილო მიმოსვლას, მერის თქმით, დაბალი ზონის სოფლებში მაღალი გამავლობის ავტომობილები გადაადგილდება.

„დაზიანდა როგორც ცენტრალური ელექტროხაზები, ასევე შიდა ქსელიც. თოვლის საფარი მაღალი ზონის სოფლებში ერთ მეტრს აჭარბებს, რაც შეეხება გადაადგილებას, დაბალი ზონის სოფლებში მაღალი გამავლობის ავტომობილები გადაადგილდებიან, მაღალ ზონაში კი პრობლემებია, ვიწყებთ გზების გაწმენდას,“ – ამბობს ფრიდონ ფუტკარაძე.

შუქი არ მიეწოდება ქედის მუნიციპალიტეტის სოფლებსაც. ქედის მერის, ლევან გორგილაძის ინფორმაციით, ამ დროისთვის ელექტროენერგია მხოლოდ მახუნცეთშია: „ვმუშაობთ, რომ დღის განმავლობაში მოხდეს შუქის აღდგენა, ცენტრალურ გზაზე, შეზღუდვით, თუმცა გადაადგილება შესაძლებელია,“ – ამბობს ლევან გორგილაძე.

რაც შეეხება ხულოს მუნიციპალიტეტს, აქ თოვლის საფარი მაღალ სოფლებში ერთი მეტრი და 20-30 სმ-ია. ხულოს მერის, გოჩა მელაძის ინფორმაციით, „რიყეთის, დიოკნისისა და საციხურის თემებში შემავალ სოფლებს შუქი არ მიეწოდება. მიმდინარეობს აღდგენითი სამუშაოები, დღის 12 საათისთვის ვვარაუდობთ შუქის აღდგენას. რაც შეეხება გადაადგილებას, სოფლებში გუშინ გაიწმინდა გზები, რაც შეეხება დაბას, დავიწყეთ გაწმენდითი სამუშაობი, ნებისმიერი მიმართულებით გადაადგილება შესაძლებელია“.

საავტომობილო გზების დეპარტამენტის ინფორმაციით, ინტენსიური თოვის, ქარბუქისა და შეზღუდული ხილვადობის გამო, შიდასახელმწიფოებრივი მნიშვნელობის ბათუმი(ანგისა)-ახალციხის საავტომობილო გზის კმ106-კმ123 მონაკვეთზე ყველა სახის ავტოტრანსპორტის მოძრაობა აკრძალულია.