15 აპრილს დაიწყება და 17 აპრილს დასრულდება წინადადებების მიღება ელექტრონულ ტენდერში, რომელიც ხულოს ბაღების გაერთიანებამ გამოაცხადა სათამაშოების შეძენაზე. ტენდერის აუცილებელი მოთხოვნაა მოწოდებული საქონელი იყო სმაღალხარისხიანი, ეკოლოგიურად სუფთა, არატოქსიკური, ჯანმრთელობისთვის უსაფრთხო, არ უნდა ჰქონდეს დამახასიათებელი მძაფრი სუნი.
სატენდერო დოკუმენტაციაში გარდა დასახელებისა და რაოდენობისა, ზოგიერთ სათამაშოს ახლავს ფოტოებიც ნიმუშად, რომ პრეტენდენტმა სწორედ ასეთი სათამაშო უნდა შესთავაზოს ბაღების გაერთიანებას.
სათამაშოების გასწვრივ მითითებულია მახასიათებლებიც. მაგალითად: „მსუბუქი მანქანა (პოლიციელი) – უნდა იყოს მყარი პლასტმასის, ქარხნული შეფუთვით, მაღალი ხარისხის, არანაკლებ 25-30 სმ სიგრძის; ლოტო – უნდა იყოს ხის,მცენარეების და ცხოველების გამოსახულებიანი 48 ჟეტონით 6 ცალი ნახატებიანი ბარათით; დომინო-ცხოველები – უნდა იყოს ხის, ფირფიტები სხვადასხვა ცხოველების ნახატებით; თოჯინა ,,პეპი” (მსგავსი ფოტო #11) – ნაჭრის, თავი პლასტმასის, ნაჭრის თმებით, ფერადი, მუსიკალური, სიგრძე არანაკლებ 35 სანტიმეტრისა“ და ა.შ.
1080 ერთეული სხვადასხვა სათამაშო მუნიციპალიტეტის 11 ბაღზე გადანაწილდება. სატენდერო პირობის თანახმად „მიწოდება უნდა განხორციელდეს შემსყიდველი ორგანიზაციის 11 ობიექტზე… სათამაშოების რაოდენობა, საბავშვო ბაღების მიხედვით, მომწოდებელზე მიწოდებული იქნება ხელშეკრულების გაფორმების დროს“.
