საქართველოს სტატისტიკის ეროვნული სამსახურის ინფორმაციით საქართველოში 124 223 სტუდენტიდან 86 247 უმაღლეს სახელმწიფო, დანარჩენი კი კერძო სასწავლებლებში სწავლობს. ქვეყანაში 20 სახელმწიფო და 53 კერძო უმაღლესი სასწავლებელი ფუნქციონირებს.
2014-2015 სასწავლო წლისთვის საზღვარგარეთ გაგზავნილ სტუდენტთა რაოდენობაა 434, ხოლო საქართველოს უმაღლეს სასწავლებლებში 4 780 უცხოელი სწავლობს. აღსანიშნავია, რომ საქართველოს უმაღლესი სასწავლებლებიდან სტუდენტებს სასწავლებლად, ძირითადად, გერმანიაში, ესპანეთში, ესტონეთში თურქეთსა და პოლონეთში აგზავნიან.
საქართველოს უნივერსიტეტებში კი უცხოელ სტუდენტებს შორის სჭარბობს აზერბაიჯანის [1 372 სტუდენტი], ერაყის [657], ინდოეთის [1 104], თურქეთის [492], ნიგერის [335], ნიგერიისა [143] და შრი-ლანკას [219] მოქალაქეები. საქართველოში 157 სტუდენტი კი რუსეთის ფედერაციის მოქალაქეა.
სტატისტიკის სამსახურის მონაცემებით [2014-2015 სასწავლო წლის დასაწყისისთვის], ქვეყანაში არსებულ სახელმწიფო და კერძო უმაღლეს საგანმანათლებლო დაწესებულებებში მოღვაწე 8 389 პროფესორ-მასწავლებლიდან 5 359 სახელმწიფო სასწავლებელში ასწავლიდა, რომელთაგან 1 229 სრული პროფესორია, ხოლო 2 065 კი ასოცირებული პროფესორი.
კერძო უმაღლეს სასწავლებლებში დასაქმებული 3030 პროფესორ-მასწავლებლიდან კი სრული პროფესორი იყო 722, ხოლო ასოცირებული პროფესორი – 1313.