ტურიზმის ფაკულტეტის დეკანის თანამდებობა მას შემდეგ გახდა ვაკანტური, რაც ყოფილი დეკანის როსტომ ბერიძის თანამდებობაზე ყოფნის ვადა ამოიწურა. დეკანი უნივერსიტეტში აირჩევა ოთხი წლის ვადით. დეკანის თანამდებობაზე ერთი და იგივე პირი შეიძლება არჩეულ იქნეს ზედიზედ მხოლოდ ორჯერ.
როსტომ ბერიძე ფაკულტეტის დეკანი იყო 2011 წლიდან, იგი დეკანის არჩევნებში მონაწილეობას წელსაც გეგმავს.
როსტომ ბერიძე უნივერსიტეტის რექტორის არჩევნებში იღებდა მონაწილეობას, თუმცა მან საკუთარი კანდიდატურა მოხსნა, რადგან, მისივე განმარტებით, იგი ნორვეგიულ პროექტში მონაწილეობს.
ტურიზმის ფაკულტეტის ახალი დეკანი შეიძლება გახდეს მხოლოდ ამავე ფაკულტეტის პროფესორი ან ასოცირებული პროფესორი, რომელსაც გააჩნია ადმინისტრაციულ ან აკადემიურ თანამდებობაზე მუშაობის არანაკლებ 5 წლის გამოცდილება. კანდიდატთა რეგისტრაცია 15 აპრილიდან 25 აპრილამდე გაგრძელდება, არჩევნები კი 27 აპრილს ჩატარდება.
არჩევნებში კანდიდატისთვის ხმის მიცემის უფლება ფაკულტეტის ყველა აკადემიურ პირს აქვს. ხმის მიცემის უფლება აქვთ ფაკულტეტის საბჭოს წევრ სტუდენტებსაც.
ტურიზმის ფაკულტეტი ერთ-ერთი ყველაზე პოპულარული ფაკულტეტია შოთა რუსთაველის სახელმწიფო უნივერსიტეტში.
