Batumelebi | შსს-ს ბაზაში დაცული ინფორმაციის გაცემის ბრალდებით სამინისტროდან 9 თანამშრომელია დათხოვნილი შსს-ს ბაზაში დაცული ინფორმაციის გაცემის ბრალდებით სამინისტროდან 9 თანამშრომელია დათხოვნილი – Batumelebi
RU | GE  

შსს-ს ბაზაში დაცული ინფორმაციის გაცემის ბრალდებით სამინისტროდან 9 თანამშრომელია დათხოვნილი

  

შინაგან საქმეთა სამინისტროს ინფორმაციით, შსს-ს გენერალური ინსპექციის მიერ ჩატარებული სამსახურებრივი შემოწმების შედეგად დადგენილია იმ თანამშრომლის ვინაობა, რომელიც შსს-ს ბაზაში არსებულ დაცულ ინფორმაციას „ნაციონალური მოძრაობის“ წევრ გივი თარგამაძეს სისტემატურად აწვდიდა. სამინისტროს ცნობით, დადგინდა, რომ საპატრულო პოლიციის თანამშრომელი რ.  ბ. თავისი კუთვნილი გენერირების მოწყობილობა „დიჯიპასი“-ს მეშვეობით სამინისტროს დაცულ კომპიუტერულ ბაზაში შევიდა, მოქალაქე რამაზ დევაძის შესახებ ინფორმაცია არასამსახურებრივად მოიძია და საზღვრის კვეთის ამსახველი ფოტომასალა გივი თარგამაძეს მიაწოდა. შემდგომ აღნიშნული ინფორმაცია ერთ-ერთმა ტელეკომპანიამ საკუთარი ეთერისთვის გამოიყენა. ასევე დადგინდა, რომ რ. ბ. გივი თარგამაძეს შსს-ს დაცული ინფორმაცია სხვადასხვა პერიოდში არაერთხელ გადასცა.

 

 

გენერალური ინსპექციის დასკვნის საფუძველზე, რ. ბ. სამსახურიდან დათხოვნილია.

“ასევე გვსურს გაცნობოთ, რომ პროკურატურამ დაიწყო გამოძიება ქალაქ თბილისში, ოქროყანის გზაზე, 2015 წლის 26 იანვარს პატრულ-ინსპექტორებსა და მოქალაქეებს შორის მომხდარ ინციდენტთან დაკავშირებით. ვინაიდან გამოძიების პროცესში გამოიკვეთა საპატრულო პოლიციის თანამშრომლების მხრიდან სამსახურებრივი უფლებამოსილების გადამეტების და განზრახ უკანონო დაკავების შესაძლო ფაქტები, სისხლის სამართლის საქმის მასალებზე დაყრდნობით, შსს-ს გენერალურმა ინსპექციამ მოკვლევა ჩაატარა. გენერალური ინსპექციის დასკვნის საფუძველზე, პატრულ-ინსპექტორ ა. დ. და ნ. ა-ს გამოძიების დასრულებამდე უფლებამოსილება შეუჩერდათ”-წერია გავრცელებულ განცხადებაში.

 

გენერალური ინსპექციის მიერ, შსს-ს ბაზაში დაცული ინფორმაციის გაცემის ბრალდებით, სამინისტროს რიგებიდან 9 თანამშრომელია დათხოვნილი.

 

შინაგან საქმეთა სამინისტრო  პოლიციის თანამშრომლებს ახსენებს  „პოლიციის შესახებ“ კანონს, რომლის თანახმად, პოლიციელს უფლება არ აქვს თავისი სამსახურებრივი მდგომარეობა გამოიყენოს რომელიმე პოლიტიკური სუბიექტის პარტიული ინტერესებისთვის.  

ნეტგაზეთის მასალების სხვა გამოცემებში გადაბეჭდვის წესი
" ბათუმელები"