დაიწყო თუ არა პროკურატურამ გამოძიება ჯაბა ანანიძის განცხადების საფუძველზე, ამ კითხვაზე პასუხს „ბათუმელები“ პროკურატურიდან ელოდება. საპარლამენტო უმრავლესობის წევრი თამარ კორძაია მიიჩნევს, რომ ჟურნალისტისა და უმაღლესი საბჭოს დეპუტატის სატელეფონო საუბარი დისკრიმინაციის ემელენტებს შეიცავს და ჟურნალისტს ურჩევს, ისარგებლოს დისკრიმინაციის ყველა ფორმის აღმოფხვრის შესახებ კანონით შემოთავაზებული ინსტრუმენტებით. ჟურნალისტმა გამოძიების დაწყების მოთხოვნით აჭარის პროკურატურას გუშინ წერილობით მიმართა.
თამარ კორძაიამ, ჟურნალისტ ჯაბა ანანიძის მიერ გამოქვეყნებული აუდიო ჩანაწერი „ბათუმელებთან“ შეაფასა:
„ის ენა, რომლითაც არჩეული თანამდებობის პირი, მით უფრო ადამიანის უფლებათა კომიტეტის თამჯდომარე ელაპარაკება ჟურნალისტს, კატეგორიულად მიუღებელია. ეს საუბარი შეიცავს დიკსრიმინაციის ელემენტებს გარკვეული ნიშნის მიხედვით.
მნიშვნელობა არ აქვს ვის ელაპარაკება დეპუტატი, მთავარი ისაა, რომ ადამიანის უფლებათა კომიტეტის თავმჯდომარემ გამოხატა საკუთარი დამოკიდებულება, ჟურნალისტთან და ნებისმიერ მოქალაქესთან როცა ასე ლაპარაკობს, როგორ უნდა ვიფიქროთ ადამიანის უფლებების სრულყოფილ დაცვაზე.
მე ვფიქრობ რომ ეს არის ის შემთხვევა, როცა ჟურნალისტს შეუძლია ისარგებლოს დიკსრიმინაციის ყველა ფორმის აღმოფხვრის შესახებ კანონით შემოთავაზებული ინსტრუმენტებით და უნდა მიმართოს წერილობით სახალხო დამცველს, რომელიც განიხილავს და კომპეტენტურ დასკვნას დადებს. ჩემი აზრით, ჟურნალისტი ამ შემთხვევაში ვალდებულია სამართლებრივად ეს ნაბიჯები გადადგას.“
