Batumelebi | მიმართვა ბათუმისა და სრულიად აჭარის სტუდენტ-ახალგაზრდობას მიმართვა ბათუმისა და სრულიად აჭარის სტუდენტ-ახალგაზრდობას – Batumelebi
ნეტგაზეთი • RU

მიმართვა ბათუმისა და სრულიად აჭარის სტუდენტ-ახალგაზრდობას

2003 წლის ნოემბერში საქართველოში მომხდარმა „ვარდების რევოლუციამ“ მთელს მსოფლიოს დაანახა ახლადჩამოყალიბებული სამოქალაქო საზოგადოების მზაობა შექმნას და იცხოვროს თავისუფალ და დემოკრატიულ სახელმწიფოში.

ამავე წლის დეკემბერში ბათუმის უნივერსიტეტში ასლან აბაშიძესთან გამართულ შეხვედრაზე სტუდენტი ახალგაზრდობისა და ინტელიგენციის მიერ გამოხატულმა პოზიციამ დაადასტურა ის აზრი, რომ აჭარის საზოგადოებრიობას სურს აჭარა იხილოს უფრო აქტიურად ჩართული საერთო, ქართულ პროცესებში, კერძოდ, სიტყვისა და აზრის თავისუფლების, პიროვნების ღირსების პატივისცემისა და დაცვის, სამოქალაქო საზოგადოების შენების საქმეში.

ჩვენ გვჯერა, რომ ნებისმიერი შეგნებული მოქალაქისათვის მიუღებელია ის ანტიკონსტიტუციური პროცესები, რაც დღეს აჭარაში ვითარდება: მოქალაქეებზე ფსიქოლოგიური თუ ძალისმიერი ზეწოლა, დამოუკიდებელი ჟურნალისტებისა და საერთოდ სიტყვის თავისუფლების შეზღუდვა, სამაუწყებლო არხების აბაშიძის ხელისუფლების სურვილისამებრ ჩართვა-გამორთვა, საგანგებო მდგომარეობის უკანონო გამოცხადებები, იმ მოძრაობების დევნა-დაპატიმრება, რომლებიც არ ეგუებიან აბაშიძის ხელისუფლების ამ თვითნებურ ქმედებებს. მოკლედ, ის პოლიტიკა, რამაც საქართველო “ვარდების რევოლუციამდე” მიიყვანა.

ღრმად ვართ დარწმუნებული, რომ ბათუმის სახელმწიფო უნივერსიტეტის ღირსეული ინტელიგენცია და სტუდენტი ახალგაზრდობა კვლავაც გააგრძელებს დიდი ქართველი მამულიშვილის, მემედ აბაშიძის მიერ გაკვალულ გზას.

ჩვენ არ გვსურს საქართველოს არც ერთ კუთხეში არეულობის პროვოცირება. ჩვენ, უბრალოდ, ვაფიქსირებთ საკუთარ პოზიციას და მზად ვართ, სამართლებრივ ჩარჩოებში, გამოვხატოთ თქვენდამი პატივისცემა და თანადგომა. ჩვენ მიგვაჩნია, რომ არსებული რეალობიდან საუკეთესო გამოსავალი სამართლიანი არჩევნები და აზრის უშიშრად გამოხატვაა.

საქართველოსთვის მძიმე წუთებში გადამწყვეტ სიტყვას, ისევ და ისევ სტუდენტი-ახალგაზრდობა ამბობდა. ჩვენ მიგვაჩნია, რომ დღეს სწორედ თქვენი პოზიციაა უმნიშვნელოვანესი მომავალი საქართველოს ფორმირების საქმეში. თქვენი პოზიცია განაპირობებს, თუ რამდენად დაჩქარდება ან შენელდება დემოკრატიული გარდაქმნითი პროცესები. მხოლოდ საქართველოს ყოველი კუთხის, მისი საუნივერსიტეტო თუ სხვა სახის გაერთიანებების ერთობლივი, შეთანხმებული მოქმედებით არის შესაძლებელი თავისუფალ, ერთიან და დემოკრატიულ ევროპულ სახელმწიფოდ ჩამოყალიბება. ღრმად გვწამს, რომ ამ საქმეში თქვენი წვლილი განუზომელი იქნება.

„სტუდენტური მოძრაობა თავისუფალი აჭარისთვის“

2004 წლის 18 თებერვალი

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.