Batumelebi | თბილისში აბაშიძის მხარდამჭერები დააკავეს თბილისში აბაშიძის მხარდამჭერები დააკავეს – Batumelebi
ნეტგაზეთი • RU

თბილისში აბაშიძის მხარდამჭერები დააკავეს

12-კაციანი ჯგუფი თავისი აზრის დასაფიქსირებლად თბილისში ჩავიდა და იქედან, უფრო კონკრეტულად კი თბილისის სახელმწიფო უნივერსიტეტიდან, როგორც თავად აცხადებდნენ – გადაწყვეტილი ჰქონდათ „ხმა მიეწვდინათ ფართო საზოგადოებისათვის“ და ცენტრსა და რეგიონს შორის არსებული დაპირისპირების მოსაგვარებლად გზები ერთობლივად დაესახათ. „ყველა რევოლუციას თითო ავტონომია შეეწირა. აჭარის დაკარგვის საშიშროებასაც ქმნიან. ყოველგვარი მოწოდება „ძირს აბაშიძე“, „ძირს სააკაშვილი“ უკანონოა… რა ჯობს ახალგაზრდების გაერთიანებას? ვერაფერი აღვიდგება ჩვენ წინ“ – განაცხადა ახალგაზრდული კავშირის  „მშვიდობის“ წევრმა ბექა გოგოსაშვილმა.

გუშინ, მთელი დღის განმავლობაში ახალგაზრდების დაკავებასთან დაკავშირებით ურთიერთგამომრიცხავი ინფორმაციები ვრცელდებოდა. ერთ-ერთი ვერსიით, ისინი სასტუმრო „აჭარადან“ „აღორძინების“ ოფისისაკენ მიემართებოდნენ, საიდანაც დაგეგმილი ჰქონდათ ბათუმში გამომგზავრება. გზაში მათ სამმა მანქანამ გზა გადაუკეტა, რომლებიდანაც სამოქალაქო ტანსაცმელში ჩაცმული პირები გამოვიდნენ და ძალის გამოყენებით, ყოველგვარი ბრალდების გარეშე წაიყვანეს სამმართველოში. თვითმხილველების თქმით, ეს მოვლენა უფრო გატაცებას ჰგავდა. დაკავებულ პირებს შორის იყვნენ: მარიამ გუდავა, ანა კალანდაძე, სულხან ხაბაძე, მერაბ მიქელაძე და ლაშა ჩახვაძე. რამდენიმე საათში გუდავა, კალანდაძე და ხაბაძე გამოუშვეს, ხოლო დანარჩენი ორი სავარაუდოდ გენპროკურატურაში გადაიყვანეს.

როგორც გუშინ, „დემოკრატიული აღორძინების კავშირის“ თბილისის ორგანიზაციაში განმარტავდნენ, მიქელაძე და ჩახვაძე სასტუმრო „აჭარასთან“ ავტომატით შეიარაღებულმა სამმა სამართალდამცველმა დაახლოებით 12.30 საათზე დააკავა. მათ პოლიციისათვის წინააღმდეგობა არ გაუწევიათ.

გუშინვე გავრცელდა, რომ პოლიციას ინფორმაცია ამ ახალგაზრდების შესახებ ბათუმელმა „კმარელებმა“ მიაწოდეს. ისინი აცხადებენ, რომ ეს ის პირები არიან, რომლებიც ბათუმში „კმარას“ ოფისებს არბევდნენ და იარაღსაც ატარებენ.

თბილისში ახალგაზრდების დაპატიმრების შესახებ ინფორმაციას არც აჭარის შინაგან საქმეთა სამინისტროში ფლობდნენ. „ჩვენ ვეძებთ ამ ბავშვებს. მათ ადგილსამყოფელს ვერ მივაგენით. სხვა სტუდენტების თქმით, ისინი პროკურატურაში მიიყვანეს. დავუკავშირდით პროკურატურას, შინაგან საქმეთა სამინისტროსაც. ეს ახალგაზრდები აქ არ არიან. მე მათ ვთხოვე, გარკვეულიყვნენ საქმეში. შეიძლება გატაცებულებიც არიან. გოგონები, ვინც ამ ორ ბიჭს ახლდნენ ამტკიცებენ, რომ ისინი პოლიციის თანამშრომლები არიან, თუმცა ფორმით არ იყვნენ. მე ვესაუბრე ბატონ შოთა ასათიანს და ვთხოვე დაედგინათ ბავშვების ადგილსამყოფელი“, – განაცხადა გუშინ აჭარის შინაგან საქმეთა მინისტრმა ჯემალ გოგიტიძემ.

მოგვიანებით ვაკე-საბურთალოს პოლიციაში დაადასტურეს, რომ აჭარის ავტონომიის მეთაურის ასლან აბაშიძის მხარდამჭერი ორი ბათუმელი სტუდენტი მერაბ მიქელაძე და ლაშა ჩახვაძე იარაღის უკანონო ტარებისთვის დააკავეს.

ვაკე-საბურთლოს შს სამმართველოს უფროსის ზურაბ გავაშელაშვილის თქმით, პოლიციას „ელსმენით მოქალაქემ შეატყობინა, რომ ერთ-ერთი მანქანით გადაადგილდებიან მოქალაქეები, რომლებსაც ცეცხლსასროლი იარაღი უნდა ჰქონოდათ“. გავაშელაშვილის ინფორმაციით, დაკავებულთაგან ერთ-ერთს აღმოაჩნდა „მაკაროვის“ სისტემის იარაღი, მეორეს „ნაგანის“  სისტემის რევოლვერი. თუმცა, დაკავებულთა ადვოკატი აცხადებს, რომ ისინი სანქციის გარეშე დააპატიმრეს.

ბოლო ინფორმაციით, ცნობილი ხდება, რომ მიქელაძე და ჩახვაძე „ბუკიას ბაღთან“ დააკავეს. მათი ადგილსამყოფელი კი რამდენიმე საათის მანძილზე უცნობი იყო.

მიქელაძესთან და ჩახვაძესთან ერთად მყოფმა ბათუმელმა ახალგაზრდებმა პრესკონფერენცია გამართეს „დემოკრატიული აღორძინების კავშირის“ თბილისის ორგანიზაციაში და საპროტესტო აქციებით დაიმუქრნენ. როგორც პარტიის თბილისის ორგანიზაციაში აცხადებენ, ეს ფაქტი „ბათუმში მიმდინარე მოვლენების გამო ერთგვარი სამაგიეროს გადახდაა“.

„ეს არის ხელისუფლების მხრიდან პირდაპირ აჭარის მიმართ გამოცხადებული ომი“ – ამბობს ბექა გოგოსაშვილი და ირწმუნება, რომ უდანაშაულო ხალხის დაჭერა ბინძური  პოლიტიკური შეკვეთაა.

სხვათა შორის, გუშინ, ამ საკითხთან დაკავშირებით კომენტარი პრემიერ-მინისტრმა ზურაბ ჟვანიამაც გააკეთა. „ჩემთვის უცნობია ვინ არიან დაკავებულები. ამ საკითხს შევისწავლი, ალბათ აღნიშულ ქმედებას საფუძველი ჰქონდა“, – თქვა პრემიერმა.

ნეტგაზეთის მასალების სხვა გამოცემებში გადაბეჭდვის წესი
თედო ჯორბენაძე