Batumelebi | ილია ვერძაძე პარლამენტის დატოვებაზე ალაპარაკდა ილია ვერძაძე პარლამენტის დატოვებაზე ალაპარაკდა – Batumelebi
ნეტგაზეთი • RU

ილია ვერძაძე პარლამენტის დატოვებაზე ალაპარაკდა

აჭარის პარლამენტში მისთვის უჩვეულო მოვლენები ვითარდება – შეიქმნა ოპოზიციური ფრაქცია „ალტერნატივა“, რომელიც ფრაქცია „მრეწველებისა“ და ედპ-ს წარმომადგენლებით დაკომპლექტდა. ფრაქციის ხელმძღვანელად ედპ-ს აჭარის რეგიონალური ორგანიზაციის ლიდერი ილია ვერძაძე აირჩიეს. გთავაზობთ ინტერვიუს ილია ვერძაძესთან:

რადგან ფრაქციის თავჯდომარე ვარ, 16 დეკემბრის პარლამენტის სხდომამ ბიუროს წევრად ამირჩია. ეს რეგლამენტის მიხედვით მოხდა.

რა მიზანი აქვს ფრაქციას?

ფრაქციის ჩამოყალიბების წინ გვქონდა საუბარი და გარკვეულ საკითხებში ურთიერთშეთანხმებას მივაღწიეთ. ჩვენი საქმიანობა აჭარაში როგორც საკანონმდებლო, ისე პოლიტიკურ სფეროებს შეეხება. დროებითი საგამოძიებო კომისიის შექმნის საკითხის დაყენებას ვაპირებთ, რომელიც შეისწავლის აჭარის ავტონომიურ რესპუბლიკაში არსებულ საკანონმდებლო დარღვევებს. ამ კანონდარღვევების წყალობით ავტონომიური რესპუბლიკის ბიუჯეტს მნიშვნელოვანი თანხები აკლდება. ეს წინადადება ფრაქციის ჩამოყალიბების დროს წამოიჭრა. უახლოეს მომავალში, იურისტებთან კონსულტაციების შემდეგ, მივცემთ შესაბამის ფორმას და საკითხს დღის წესრიგში დავაყენებთ. ამ მოთხოვნას პარლამენტში დეპუტატათა გარკვეულმა ნაწილმა უნდა დაუჭიროს მხარი. თუ ასეთი კომისია შეიქმნა, კანონის მიხედვით, „აღორძინება“ უმრავლესობით მას ვერ დააკომპლექტებს. აქედან გამომდინარე პასუხისმგებლობას ვერც ჩვენ გავექცევით.

როგორ შეხვდა აჭარის პარლამენტი ფრაქციის შექმნას?

ალბათ, ჩვენი ორწლიანი მოღვაწეობის ბრალია, რომ ოპოზიციურ ძალად არ აღგვიქვამენ. ჩვენმა ზომიერებამ ის სტერეოტიპი ჩამოაყალიბა, რომ ამ პარლამენტში შეუძლებელია ოპონირება. მე ვფიქრობ, ნებისმიერ საკითხში, თუ ის ერთპარტიულად წყდება, გარკვეული პერიოდის შემდეგ იქნება გადაცდომები. ამიტომ ჩვენ უნიკალურობაზე და პირველობაზე პრეტენზია არ გაგვაჩნია, ჩვენი მიზანია მოვახერხოთ ღირსეული ოპონირება და აქედან გამომდინარე ჩვენმა მოღვაწეობამ დადებითი შედეგი გამოიღოს. რადგან ეს ნაბიჯი გადავდგით – ვმონაწილეობთ ამ პარლამენტის მუშაობაში, ვგრძნობთ პასუხისმგებლობას, რომ ეს ინსტიტუტი გამართლებული იყოს. ვფიქრობ, აჭარის არ საკანონმდებლო ორგანო მნიშვნელოვანი წარმონაქმნია, რომელიც აუცილებლად უნდა არსებობდეს და რომელშიც უფრო ცოცხალი პოლიტიკა უნდა ტარდებოდეს.

აჭარაში ოპოზიცია, აჭარის პარლამენტის ვადამდელი არჩევნების ჩატარებას მოითხოვს. რამდენად არსებობს ამის აუცილებლობა?

ჩემგან ამაზე პასუხის გაცემა უხერხულია. არ ვიცი ამ მოთხოვნას რა საფუძველი ექნება. მთავარია, აჭარაში სამოქალაქო დაპირისპირება არ მოხდეს. თუკი ამისათვის პარლამენტის დატოვება იქნება საჭირო, დავტოვებ.

პარლამენტის ახალ სპიკერზე რას იტყვით?

გიორგი ცინცქილაძე ძალიან კარგი პიროვნებაა. ვინც არ უნდა იყოს სპიკერი, რასაც ვგეგმავდით ფრაქციის ჩამოყალიბებისას, იმის გაკეთებას ბოლომდე შევეცდებით. ამ სიტუაციაში ცინცქილაძის არჩევა ხელისუფლების მხრიდან იყო ოპტიმალური ვარიანტი. მისი პიროვნული თვისებებიდან გამომდინარე, ეს კონფლიქტის დეესკალაციისთვის გადადგმული ნაბიჯია.

ნეტგაზეთის მასალების სხვა გამოცემებში გადაბეჭდვის წესი
ემზარ დიასამიძე