ასლან აბაშიძე მოსკოვში ერთკვირიანი ვიზიტის შემდეგ ბათუმში დღეს დაბრუნდა. როგორც მან აეროპორტში ჟურნალისტებთან განაცხადა, მისი ვიზიტის ერთადერთი მიზანი ენერგეტიკის საკითხები იყო. ასლან აბაშიძის თქმით, ამის შესახებ ინფორმირებული იყვნენ რუსეთის და საქართველოს პრეზიდენტები. აბაშიძემ განაცხადა, რომ რუსეთიდან 100 მეგავატი ელექტროენერგიის მოწოდების საკითხი თითქმის გადაწყვეტილია, ტექნიკური დეტალების მოსაგვარებლად კი ბათუმში ამ საღამოსვე ჩამოვლენ რუსი ენერგეტიკოსები. როგორც ავტონომიის ლიდერმა განაცხადა, ამით არა მარტო აჭარა, არამედ მეზობელი რეგიონებიც მოიგებენ, რადგანაც აჭარას 100 მეგავატი არ ესაჭიროება და ელექტროენერგიას სხვა რეგიონებსაც მიაწვდიან. ამასთან სამი თვის განმავლობაში ელექტროენერგია მოსახლეობისათვის უფასო იქნება.
სამთავრობო დაცვის უფროსის დავით ხალვაშის მიმართ გენპროკურატურაში აღძრულ საქმესთან დაკავშირებით აბაშიძემ განაცხადა, რომ ეს არის მორიგი პიარი, რომელიც გარკვეულმა ძალებმა ააგორეს, იმიტომ რომ თემები შემოელიათ. თუმცა აჭარის ლიდერი არ აკონკრეტებს, თუ რომელი ძალაა ამით დაინტერესებული.
ასლან აბაშიძე ადასტურებს გავრცელებულ ინფორმაციას სწრაფი რეაგირების რაზმის უფროსის გენერალ ნეტკაჩოვის გადაყენების თაობაზე, თუმცა დასძენს, რომ ნეტკაჩოვი საბოლოოდ არ „გაუწირავს“ და ის წარმომადგენლობაში დატოვა.
ახალი მინისტრთა კაბინეტის თაობაზე აბაშიძე კომენტარს ფაქტობრივად არ აკეთებს. იმის გამო, რომ მოსკოვში იმყოფებოდა, წარდგენილი კანდიდატურებიდან მხოლოდ პირველ პირს, ანუ ზურაბ ჟვანიას იცნობს. შესაბამისად, ჯერ უცნობია დაუჭერს თუ არა მხარს „აღორძინების“ წარმომადგენლობა მხარს „ზედმეტად ახალგაზრდა მინისტრთა კაბინეტს“.
ქართველი სამხედროების რუსეთსა და ჩეჩნეთში გაყვანასთან დაკავშირებით კი აბაშიძე კომენტარს არ აკეთებს.
აბაშიძეს აეროპორტში მხოლოდ აჭარის მთავრობის წევრები და ჟურნალისტები დახვდნენ. ინფორმაცია იმის შესახებ, რომ მას ბათუმის უნივერსიტეტთან მრავალრიცხოვანი მხარდამჭერები ელოდნენ, არ გამართლდა. აქცია მართლაც იგეგმებოდა, თუმცა გაურკვეველი მიზეზების გამო ჩაიშალა. სამაგიეროდ, საღამოს ბათუმის თეატრში აჭარის ლიდერი აჭარის უხუცესებს შეხვდა.
