"ბათუმელების“ არქივიდან

მალე აჭარაში ხალხმრავალი გამოსვლები დაიწყება

04.02.2004 • 1590
მალე აჭარაში ხალხმრავალი გამოსვლები დაიწყება

უკანასკნელ პერიოდში აჭარის ხელისუფლების ოპონირებაში პოლიტიკური პარტიები და ინტელიგენციის წარმომადგენლები ერთმანეთს ტოლს არ უდებდნენ. მიუხედავად იმისა, რომ „ჩვენ აჭარას“ კარები ყველასათვის ღია ჰქონდა, აჭარის ხელისუფლების შეცვლისა და რეგიონში დემოკრატიული პროცესების დამკვიდრების სურვილით უამრავი საზოგადოებრივი ორგანიზაცია ჩამოყალიბდა. მათ შორის გამორჩეული მდგომარეობა „დემოკრატიულმა აჭარამ“ და „ერთიანობის დარბაზმა“ დაიჭირეს. პირველს ედვარდ სურმანიძე ხელმძღვანელობდა. მან „ბურჯანაძე-დემოკრატების“ ინტერესების დასაცავად აჭარიდან დედაქალაქში ათასობით მხარდამჭერი ჩაიყვანა.

მეორე ორგანიზაციას სათავეში  იოსებ ხიმშიაშვილი ედგა და ყოფილი ჩინოვნიკებისა და ინტელიგენციის იმ ნაწილით იყო დაკომპლექტებული, რომლებიც ახლო წარსულში ან ასლან აბაშიძის ხელისუფლების სამსახურში იდგნენ, ან ოპოზიციურ დამოკიდებულებას არ ამჟღავნებდნენ.

მიუხედავად იმისა, რომ „დემოკრატიული აჭარას“ შექმნის გამო „ჩვენი აჭარის“ ლიდერები უკმაყოფილებას ღიად აფიქსირებდნენ და ზურაბ ჟვანიას ასლან აბაშიძესთან თანამშრომლობაში სდებდნენ ბრალს, მდგომარეობა სულ მალე შეიცვალა – „დემოკრატების“ „ნაციონალებთან“ შერწყმით ჟვანია ერთიანი პარტიის სათავეში მოგვევლინა. ამის შემდეგ  „ჩვენი აჭარა“ ამბიციებს თმობს. მისი ერთ-ერთი თანათავმჯდომარე თამაზ დიასამიძე „დემოკრატიულ აჭარასთან“ გაერთიანებაზე მისი დაფუძნების მეორე დღესვე აკეთებს განცხადებას და ამბობს, რომ გაერთიანებაში სურმანიძის  და მისი მომხრეების ინტერესები იქნება გათვალისწინებული.

სანამ თბილისში დაარსებული ორგანიზაციები გაერთიანდებოდნენ, მანამდე „ერთიანობის დარბაზი“ „ჩვენი აჭარას“ რიგებში შევიდა. იოსებ ხიმშიაშვილის გან-ცხადებით: „ვინაიდან „ერთიანობის დარბაზს“ იგივე ამოცანები  და მიზნები აქვს, რაც „ჩვენს აჭარას“, ამიტომაც გადავწყვიტეთ გაერთიანება“.

თამაზ დიასამიძის აზრით „ადგილობრივი ხელისუფლების ერთადერთი გამოსავალი ისაა, რომ ჩვენს შორის გაუგებრობას და ურთიერთქიშპობას ჰქონდეს ადგილი. ამ გაერთიანებით  ძალიან დიდ საქმეს ვაკეთებთ. ყველა მათგანის ინტერესები გათვალისწინებული იქნება და მათ მუშაობის მეტი საშუალება მიეცემათ“.

ოპოზიციური ძალების გაერთიანებას საბოლოო წერტილი გუშინ, 3 თებერვალს, სასტუმრო მეტეხში დაესვა. „ჩვენი აჭარას“ შემადგენლობაში 4 ორგანიზაცია – „ჩვენი აჭარა“, „დემოკრატიული აჭარა“, „ერთიანობის დარბაზი“ და „აფსაროსი“ შევიდა. გაერთიანებას ამიერიდან ორი თანათავმჯდომარე უხელმძღვანელებს, ედვარდ სურმანიძე და კობა ხაბაზი.

„ჩვენი აჭარა“ თავის ცენტრს უახლოეს დღეებში თბილისიდან ბათუმში გადმოიტანს. კობა ხაბაზის განცხადებით სულ მალე აჭარაში ხალხმრავალი გამოსვლები დაიწყება.

 

გადაბეჭდვის წესი


ასევე: