"ბათუმელების“ არქივიდან

ხელისუფლების მიერ კანონების იგნორირება ოპოზიციის შანსებს ზრდის

04.02.2004 • 1210
ხელისუფლების მიერ კანონების იგნორირება ოპოზიციის შანსებს ზრდის

ახალი პრეზიდენტის ხელისუფლებაში მოსვლის ეიფორიის ფონზე, გაჩნდა საშიშროება, რომ ახალი პარლამენტი ერთპარტიული იქნება. ოპოზიცია ალბათ ნაციონალებისა და დემოკრატების რიგებში შესაძლო განხეთქილების შედეგად გაჩნდება. ეს აზრი ქართულ პოლიტიკურ წრეებში დიდი ხანია მუსირებს. თუმცა, სახელისუფლო ძალის გარდა სხვა პარტიის პარლამენტში მოხვედრის აუცილებლობაზე ხელისუფლებაც საუბრობს.  ზოგიერთი ექსპერტის აზრით მათ ოპონირებას მემარჯვენე ძალები გაუწევენ. არადა გაერთიანება ვერც მემარჯვენეებმა მოახერხეს.

ედპ-ტრადიციონალისტები უკვე ერთიანდებიან, მეორე ბანაკში მოლაპარაკების მაგიდასთან ორ ნოემბერს ვერ შემდგარი ალიანსის წევრები, ახლები, მრეწველები და ქრისტიან-დემოკრატები დგანან. სავარაუდოდ, მათი გაერთიანება არსებული სიტუაციიდან გამომდინარე აუცილებლობის გამო შედგება.

ჟვანია-სააკაშვილის გუნდების გაერთიანების შემდეგ, ხმები ნინო ბურჯანაძის ოპოზიციის ბანაკში გადაბარგების შესახებ, სულ უფრო რეალური ხდება. თავად ბურჯანაძე ამ მოსაზრებას კატეგორიულად უარყოფს, თუმცა, მომავალ პარლამენტში ის საკუთარი დასაყრდენის შექმნას აუცილებლად შეეცდება. ესენი სავარაუდოდ, მემარჯვენეები იქნებიან.

ამ მხრივ ყველაზე საინტერესოდ ედპ-ტრადიციონალისტთა ტანდემია. ტრადიციონალისტები ვარდების რევოლუციაში აქტიურად ღებულობდნენ მონაწილეობას და მათი ოპოზიციაში გადასვლა, როცა ხელისუფლებაში ყოფნის რეალური შესაძლებლობა ჰქონდათ, უცნაურია.

შესძლებს თუ არა ედპ-ტრადიციონალისტთა ტანდემი საარჩევნო ბარიერის დაძლევას. ედპ-ს აჭარის რეგიონალური ორგანიზაციის ხელმძღვანელი ილია ვერძაძე ოპტიმისტურადაა განწყობილი: „იყო მოთხოვნები, რომ არჩევნების ჩატარების ვადა გადაწეულიყო. რაც თავის თავში შეიცავდა ფარულ ჩანაფიქრს – დრო გავა, ხელისუფლება უფრო მეტ შეცდომებს დაუშვებს. მიმდინარე სიტუაცია ამ პოსტულატის სინამდვილეს ადასტურებს. უკვე იკვეთება მოსახლეობის უკმაყოფილება ხელისუ-ფლების წინააღმდეგ, თუნდაც ეს იყოს ერთ კონკრეტულ საკითხში, რაც თავისთავად ხელისუფლების მაღალ რეიტინგს აქვეითებს. დარწმუნებული ვარ, ორი თვე საკმარისია იმისათვის, რომ ხელისუფლებამ რამოდენიმე შეცდომა დაუშვას და კანონების უგულვებელყოფა მოახდინოს. დღეს უკვე სერიოზულად მიდის კონს-ტიტუციური ცვლილებების გამო კანონების იგნორირება, რაც ყველა ქვეყანაში დაუშვებლად მიაჩნიათ. ეს ოპოზიციის შანსებს ზრდის“, – აცხადებს ვერძაძე.

ვერძაძის აზრით ხელისუფლების მიერ განხორციელებული დაჭერები მოსახლეობის ფსიქოლოგიაზე ზემოქმედებისთვის ცოტა ხანს ეყოფა და სააკაშვილის პოპულიზმი ბოლომდე ასეთი წარმატებული ვერ იქნება.

რაც შეეხება ედპ-ტრადიციონალისტების აჭარის ხელისუფლებასთან ურთიერთობას. აჭარის პარლამენტის დეპუტატი, ილია ვერძაძე ბოლო დროს განვითარებული მოვლენების შემდეგ ოპოზიციური ფრაქციის ჩამოყალიბების ინიციატორია, თუმცა ფრაქციას რეგისტრაციაში არ ატარებენ. მისი აზრით, აჭარის ხელისუფლება დღითი-დღე უშვებს შეცდომებს, რასაც ოპოზიცია იყენებს და რადიკალურად უპირისპირდება. „არსებული ხელისუფლების პლიუსები უნდა იქნეს ნებისმიერი ცვლილების შემთხვევაში შენარჩუნ-ებული, ეს ეხება სტაბილურობას. ასევე არ შემიძლია არ ავღნიშნო ის დადებითი მომენტები, რაც ამ რადიკალურმა ოპოზიციამ შემოიტანა. მიუხედავად იმისა, რომ მათთან გაერთიანებას არ ვაპირებ, თანამშრომლობას არჩევნების პერიოდში აუცილებლობად მივიჩნევ“.

გადაბეჭდვის წესი


ასევე: