აგვისტოში, ტურისტული სეზონის პიკზე, განსაკუთრებული დატვირთვით სანაპირო ზოლი და ბულვარი გამოირჩევა. თუმცა ბულვარის ახალი და ძველი ნაწილი კონტრასტულ სურათს ქმნის. მაშინ, როდესაც ძველ ბულვარში სიცოცხლე დუღს, ახალ ბულვარში ადამიანები კანტიკუნტად დადიან.
დღის განმავლობაში ძველ ბულვარში შესამჩნევი ხალხმრავლობაა. სკამებზე, მინდვრებსა და ხეივანში დასასვენებლად გამოსულ უამრავ ადამიანს შენიშნავთ. დიდი დატვირთვით მუშაობს სხვადასხვა კვების ობიექტი, ჯიხური თუ მაღაზია. ხშირად შეხვდებით ქუჩის მუსიკოსებს, მხატვრებს, ფოტოგრაფებს, ხელნაკეთი სუვენირების გამყიდველებს, რომლებიც თქვენს თვალწინ ამზადებენ ნივთებს.
სულ სხვა ვითარებაა ახალ ბულვარში. სეირნობისთვის ეს ადგილი არც ისე შესაფერისია, რადგან სიცხე აჭერს და ჩრდილის პოვნა რთულია. აქ ხალხი პლაჟზე გადმოსვლისა და გადასვლის დროს თუ გაივლის, არც ბევრი სავაჭრო ცენტრი და გასართობია. ახალ ბულვარში მდებარე საბავშვო-გასართობ პარკში საღამოს საათებში თუ ნახავთ ბავშვებს, ისიც, ძირითადად, ახლომდებარე საცხოვრებელი კორპუსებიდან. ძველ და ახალ ბულვარს შორის მსგავსი კონტრასტი არც ღამის საათებში იცვლება. ახალ ბულვარში მხოლოდ ერთი კლუბია, რომლის კლიენტებიც ახალი ბულვარის ტერიტორიაზე ზემოთ აღნიშნულ სურათს ვერ ცვლიან.
ახალი ბულვარი
ბათუმელი სტუდენტი, ელზა გელაძე ამბობს, რომ ახალ ბულვარში იშვიათად დადის. „თავიდან, როდესაც გაიხსნა, რამდენიმე კონცერტი იყო, საღამოობით გამოვდიოდით მეგობრები. ვერთობოდით. ახლა ძირითადად კონცერტებიც ძველ ბულვარშია გადატანილი. დღისით ცხელა, ღამით გასართობი არ არის, თან ცენტრისგან მოშორებითაა, ამიტომ აქ იშვიათად თუ გამოვალ, საღამოობით თუ მშვიდად სეირნობა მინდა, მაგალითად“, – ამბობს ელზა და დასძენს, რომ მასთან სტუმრად ჩამოსული მეგობრებიც არ დაინტერესებულან ბულვარის ამ ნაწილის მეორედ მონახულებით.
ახალი ბულვარი
ბათუმის შვიდი კილომეტრი სიგრძის ბულვარში, 1200 მეტრი ე.წ. ახალ ბულვარს უკავია. ბულვარის ეს ნაწილი 2009 წელს ესპანელი არქიტექტორის დაპროექტებით გაშენდა და როგორც ბათუმის საკრებულოს ყოფილი თავმჯდომარე და ამჟამინდელი მაჟორიტარობის კანდიდატი საქართველოს პარლამენტში „ნაციონალური მოძრაობიდან“ გიორგი კირთაძე ამბობს, ახალი ბულვარის დანიშნულება ძველი ბულვარის განტვირთვა უნდა ყოფილიყო:
„კლუბები და ხმაურის გამომწვევი გასართობი დაწესებულებები უნდა გადასულიყო ახალ ბულვარში და ძველი ბულვარი დასასვენებელ, წყნარ ნაწილად დარჩენილიყო. მაშინ იქ ორი დიდი კლუბი – „ბამბა რუმსი“ და „აჭარა მიუზიქჰოლი“ გადავიდა, იმართებოდა კონცერტებიც და რომ გაგრძელებულიყო მისი განვითარების ტენდენცია იმავე ტემპებით, ამ დროისათვის უკვე ხალხმრავალი და ხმაურიანი ადგილი იქნებოდა“, – ამბობს ბათუმის საკრებულოს ყოფილი თავმჯდომარე და აღნიშნავს, რომ საკრებულოს გადაწყვეტილებით გარკვეული შეზღუდვები დაწესდა ძველი ბულვარის ტერიტორიაზე, ხოლო ახალ ბულვარს ეს შეზღუდვები სპეციალურად არ შეეხო.
ახალი ბულვარი
გიორგი კირთაძის მიერ დასახელებულ კლუბებს, რომლებიც 2010 წელს ახალ ბულვარში გადავიდა, ბათუმის ბულვარის ადმინისტრაციის მარკეტინგის სამსახურის უფროსი, დავით გამრეკელაშვილიც იხსენებს. მისი თქმით, ერთი წლის მუშაობის შემდეგ კლუბებს აღარ გაუჩნდათ იმ ტერიტორიაზე მუშაობის სურვილი.
„დღემდე არაერთხელ გამოვაცხადეთ ტენდერები, მაგრამ ბიზნესმენები არ არიან დაინტერესებულები. ამ დროისათვის მუშაობს ერთი დიდი კლუბი და რამდენიმე მცირე კვების ობიექტი, ჯიხურების სტილში. ფასების შეღავათიც აქვთ – ძველ ბულვართან შედარებით ახალ ბულვარში თითქმის სამჯერ დაბალ ფასებს ვთავაზობთ, მაგრამ არ არის დაინტერესება“, – აღნიშნავს დავით გამრეკელაშვილი. მისი თქმით, ამის მიზეზი ის არის, რომ ხალხი არ დადის აღნიშნულ ტერიტორიაზე.
„ნარგავები პატარაა და შესაბამისად მთელ ახალ ბულვარში არ არის ჩრდილი. ასეთ პირობებში ზაფხულის სიცხის დროს, რა თქმა უნდა, არც ადგილობრივები და არც დამსვენებლები იქ არ წავლენ, თორემ ინფრასტრუქტურა მოწესრიგებულია, არის ბავშვთა გასართობი პარკიც“, – ამბობს ბულვარის ადმინისტრაციის მარკეტინგის სამსახურის უფროსი.
შეკითხვას, როგორ გეგმავს ბათუმის ბულვარის ადმინისტრაცია ახალი ბულვარის განვითარებას და აქვს თუ არა კონკრეტული სტრატეგია შემუშავებული, დავით გამრეკელაშვილი პაუხობს, რომ ამ ეტაპზე მიმდინარეობს მოლაპარაკებები იქ რამდენიმე კონცერტის ჩასატარებლად. კონცერტები ამ სეზონზე იგეგმება, ხოლო დანარჩენი, კონკრეტული საკითხები, რომლებზეც იმუშავებს ბულვარის ადმინისტრაცია, ამ დროისათვის განსაზღვრული არ არის: „მომავალი წლიდან ალბათ უკვე გამოკვეთილი გვექნება გეგმაც და საკითხებიც, როგორ უნდა განვითარდეს ახალი ბულვარი. ამ ეტაპზე სხვას ვერაფერს გეტყვით“.
ახალი ბულვარი
