„მდინარესთან ახლოს 8000 მეტრი დაკანონებული მიწა მქონდა, რომელზეც ბოსტნეული მომყავდა, 1300 მეტრამდე კი დაუკანონებელი, რასაც საძოვრად და სათიბად ვიყენებდი. როცა ჰესის მშენებლობა დაიწყეს, ის მიწა, რომელიც დაკანონებული იყო, გავყიდე, კვადრატში 9 ლარი და 80 თეთრი გადამიხადეს, მაგრამ მიწა, რომელიც დაუკანონებელი იყო, ჯერ მითხრეს, ეს არ გვჭირდებაო და არ იყიდეს, რამდენიმე დღის შემდეგ, რაღაც შენობა ჩადგეს, ჩემი სათიბი დაიკავეს, არც ფული გადამიხადეს და ვერც ჩემს მიწას ვსარგებლობ, ყოველ დღე მივდივარ, მაგრამ ვერაფერი გავარკვიე. ადრე კი მითხრეს, წელიწადში 500 ლარს მოგცემთო, მაგრამ იმის მერე დავდივარ და არაფერი“, – ამბობს ზურაბ ჯაყელი.
ზურაბის ძმა, შოთა ჯაყელი ყვება, რაც ფირმის წარმომადგენლებმა უთხრეს: „მითხრეს, მიწა დაკანონებული რომ არ გაქვს, თანხას ვერ გადაგიხდი, თურმე ასე უთქვამს კახი კალაძესო. მე, გლეხმა კაცმა, რა ვიცი ვინ რა თქვა. მე ის ვიცი, რომ ჩემი მიწა იყო და ახლა ვერ ვსარგებლობ, იქნებ ვინმემ დაგვეხმაროს და გამარკვიოს, რატომ არაფერს მიხდიან ჩემ მიწაში?“.
„აჭარისწყალი ჯორჯიას“ შესყიდვების ოფიცერი ავთანდილ ივანაძე ადასტურებს, რომ ჯაყელების მიწა კომპანიის შემოსაზღვრულ ზოლში მოექცა.
კომპანიის შესრულებული სამუშაოების ზედამხედველი ოთარ ჯაფარიძე ამბობს, რომ შოთა და ზურაბ ჯაყელები კომპენსაციას ყოველწლიურად მიიღებენ, შესაბამისი ხელშეკრულება კი უახლოეს პერიოდში გაფორმდება:
„აღნიშნულ პიროვნებებთან პირველ ეტაპზე სიტყვიერი შეთანხმება დაიდო, რომ ჩვენ მათ ყოველწლიურად კომპენსაციას – 500 ლარის ოდენობით გადავუხდით, ვიდრე ფირმა სამუშაოებს არ დაასრულებს. რაც შეეხება ხელშეკრულებას, იურისტი თბილისში იყო წასული და ამიტომ ვერ გაფორმდა, უახლოეს დღეებში გავუფორმებთ. კომპენსაციას კი მაშინ მიიღებენ, როცა კომპანიას თხოვნით მიმართავენ და ეს იქნება მოსავლის აღების დრო“.
