მეწყერი განვითარდა სოფელ ზენდიდში, თენგიზ ბერიძის და სოფელ აქუცაში – არსენ თურმანიძის საცხოვრებელ სახლთან. სოფელ გულებში მემედ დიასამიძის სახლთან განვითარებულმა მეწყერმა რვა ოჯახთან მისასვლელი გზა ჩაკეტა, გზა ჩაკეტილია სოფელ ხუნკუდაშიც.
სოფელ ორცვაში მდინარე ჭანჭახევის მილი ვეღარ ატარებს წყალს და გზაზე მიედინება.
კორომხეთი-ხოხნის მიმართულებით, სოფელ არსენაულის საცალფეხო გზის ნაწილი დაზიანებულია.
შუქი არ მიეწოდება შემდეგ სოფლებს: ორცვა, არსენაული, კორომხეთი, ძენწმანი, გულები, ხუნკუდა, ზენდიდი და ცხემნა.
სოფელ ქედაში გიორგი თურმანიძისა და ამირან თებიძის სახლების მიმდებარედ წამოსული მიწის მასა საფრთხეს უქმნის საცხოვრებელ სახლს.
ადიდდა მდინარე ბზანა, რომელიც საფრთხეს უქმნის სავარგულებს.
პირველ მაისის თემში, სოფელ აგარის გზაზე განვითარდა მეწყერი; ასევე, მეწყერი განვითარდა სოფელ კოლოტაურში, ბუჭიის უბნის გზაზე, დანდალოს თემში, სოფელ ხარაულაში – ზაქარაშვილების უბანში.
წონიარისის თემში, სოფელ ვარჯანისში, რომან ბერიძის საცხოვრებელ სახლთან მეწყერი განვითარდა, ასევე, ბადრი ბერიძის საცხოვრებელ სახლთან ჩამოწვა მეწყერი, სახლის მისასვლელთან გზა ჩახერგილია.
წონიარისში, ზაურ ხალვაშის საცხოვრებელ სახლთან გზაა წაღებული.
აბუქეთაში, ნაომლის უბანში, ქარმა ემზარ ბერიძის საცხოვრებელ სახლს სახურავი გადახადა.
აბუქეთაში 8 ოჯახმა დაცალა საცხოვრებელი სახლი.
ზვარეს თემში სოფელ ზვარეში რეზო ქობულაძის სახლთან განვითარდა მეწყერი.
სოფელ სირაბიძეებში, ლევან ბერიძის საცხოვრებელ სახლთან ჩამოწვა მეწყერი.
სიხალიძეების საავტომობილო გზაზე განვითარდა მეწყერი და მიმდინარეობს გაწმენდითი სამუშაოები.
ლატევრისა და ნამეფვარის მთაზე გათოვდა და გზა ჩაიხერგა.
გობრონეთში 40 აბონენტს არ მიეწოდება შუქი.
რაც შეეხება სკოლებს, ქედის ყველა სკოლაში მიმდინარეობს სასწავლო პროცესი. მხოლოდ სამ საბავშვო ბაღში – ოქტომბრის, ქედის # 2 სა და წონისრისის – არ მიმდინარეობს სააღმზრდელობლო პროცესი ბავშვების გამოუცხადებლობის გამო.
ქედის გამგებლის, დავით დუმბაძის თქმით, ამ დროისათვის ქედაში 20 ერთეული ტექნიკა მუშაობს. „პირველ ეტაპზე ვწმენდთ სოფლებთან დამაკავშირებელ გზებს, რომ საჭიროების შემთხვევაში სოფლებში სასწრაფო- სამაშველო სამსახურებმა გადაადგილება შეძლონ. რაც შეეხება აკავრეთას პარკს, სადაც მდინარე აკავრეთა გადმოვიდა კალაპოტიდან, მზად გვაქვს „სინკარები”, რომლებსაც ჩავაწყობთ“.
