ბათუმის მერია ისტორიული ზონის დამტკიცებისთვის მოსამზადებელ სამუშაოებს შეისყიდის. ამისთვის მერია ბიუჯეტიდან 20 000 ლარის დახარჯვას გეგმავს. შესაბამის ცვლილებებს ბიუჯეტში, ხვალ, 5 ივლისს, საკრებულოს რიგგარეშე სხდომაზე უყრიან კენჭს.
საზოგადოება „ბათომი“, რამდენიმე თვეა ინტენსიურად ითხოვს ძველი ბათუმის ტერიტორიას განესაზღვროს და დაუმტკიცდეს ისტორიული განაშენიანების დაცვის ზონა. ორგანიზაციაში მიიჩნევენ, რომ ეს რეგულაცია, დაეხმარება ქალაქს შეინარჩუნოს ისტორიული ნაწილის იდენტობა და განაშენიანება.
დღეს არსებული რეგულაციით, ისტორიული უბნის საზღვრები დადგენილი არ არის. ძველ ბათუმში შესაძლებელია 15 მეტრი სიმაღლის შენობების აგება. შედეგად, ტერიტორიაზე გაჩნდა 5-სართულიანი სახლები, რამაც ისტორიული სახლები ჩაანაცვლა.
