მერაბ ღოღობერიძის განმარტებით მოქალაქესთან ერთად, რომელსაც 24 კვადრატის მიწის ფართობის პრივატიზების პირობების გაგება სურდა, მის დასახმარებლად იურისტთან კონსულტაციის მისაღებად მიდიოდა.
„იურისტები არ ისხდნენ თავიან კაბინეტში, რის გამოც, მეორე სართულზე ადმინისტრაციაში წავედი – ნუკრი დეკანაძესთან. დაცვამ არ შემიშვა, მომვარდა და ქურთუკი გამიხია. ამის დასადასტურებლად ამოიღონ კადრები და ნახონ. ეს არის ჩავლეიშვილის დავალებული პროვოკაცია, რომ აღარ შევეშვი საკრებულოს შენობაში,“- განუცხადა „ბათუმელებს“ მერაბ ღოღობერიძემ.
დაცვის სამსახურმა ადგილზე საპატრულო პოლიცია გამოიძახა. ამჟამად საპატრულო პოლიცია მერაბ ღოღობერიძესა და დაცვის თანამშრომლებს კითხავს.
მერაბ ღოღობერიძე დღევანდელ ინციდენტს, რამდენიმე დღის წინ საკრებულოს თავმჯდომარის მისაღებში მოწყობილ, ბათუმელი იპოთეკარების აქციას უკავშირებს, რომელიც მისი ორგანიზებით გაიმართა. ის ვარაუდობს, რომ ბათუმის საკრებულოს თავმჯდომარემ სწორედ იმ ფაქტის შემდეგ გასცა დაცვის გამკაცრების ბრძანება.
დაცვის თანამშრომლების განმარტებით კი მერაბ ღოღობერიძემ ძველი საშვი გამოიყენა, რაც მისი არ შეშვების მიზეზი გახდა.
საკრებულოში ამ წუთებში სხდომა მიმდინარეობს, რის გამოც შენობაში სხვადასხვა სახის კონსულტაციის მისაღებად მისულ მოქალაქეებსაც არ უშვებენ და ისინი სხდომის დამთავრებას ელოდებიან.
