სამებაში ილია მეორის წესის აგების მსახურება მიმდინარეობს

სამების საკათედრო ტაძარში კათოლიკოს-პატრიარქის დაკრძალვის ცერემონია მიმდინარეობს.

სამებაში წირვა დილის 9 საათზე დაიწყო. დღის 12 საათზე სამების საკათედრო ტაძარში მივიდა კონსტანტინოპოლის – ახალი რომის მთავარეპისკოპოსი და მსოფლიო პატრიარქი, ყოვლადუწმინდესი ბართლომეოს პირველი.

საპატრიარქო ტახტის მოსაყდრე შიოსთან ერთად მსოფლიო პატრიარქმა ილია მეორის წესის აგების მსახურება დაიწყო.

კათოლიკოს-პატრიარქის დაკრძალვის მსახურებას სამებაში 5 მართლმადიდებელი ავტოკეფალური ეკლესიის პატრიარქი ესწრება:

მსოფლიო პატრიარქი ბართლომეოსი, ბულგარეთის პატრიარქი უწმინდესი დანიელი, სრულიად ალბანეთის მთავარეპისკოპოსი უნეტარესი იოანე, ჩეხეთისა და სლოვაკეთის მიტროპოლიტი უნეტარესი როსტისლავი და ამერიკის მიტროპოლიტი ტიხონი.

ასევე, სამების საკათედრო ტაძარში დაკრძალვის ცერემონიალს ესწრებიან სხვადასხვა რელიგიური კონფესიების წარმომადგენლები.

სამებაში კათოლიკოს-პატრიარქის დაკრძალვის ცერემონიას ესწრებიან მთავრობის წევრები და სხვადასხვა ქვეყნის დიპლომატიური მისიები.

ასევე, 22 მარტს, დილით, ცნობილი გახდა, რომ საპატრიარქომ შეცვალა გადაწყვეტილება და რიგით მოქალაქეებსაც შეუძლიათ შევიდნენ სამების საკათედრო ტაძარში და პატივი მიაგონ გარდაცვლილი პატრიარქის ხსოვნას.

გთავაზობთ ფოტოებს საზოგადოებრივი მაუწყებლის პირდაპირი ეთერიდან.