სამშაბათს, 3 თებერვალს, ღამით, რუსეთმა მასშტაბური, კომბინირებული დარტყმები მიაყენა უკრაინის რამდენიმე რეგიონს, მათ შორის კიევსა და ხარკოვს. მედიის ცნობით, რუსეთის შეტევის ფონზე კიევში ტემპერატურა მინუს 20 გრადუსი იყო, ხოლო ხარკოვში – მინუს 24 გრადუსი.
უკრაინის საგარეო საქმეთა მინისტრმა, ანდრეი სიბიჰამ სოციალურ ქსელ X-ზე დაწერა, რომ დღეს განხორციელებული თავდასხმების დროს რუსეთმა სულ 450 დრონი და 60-ზე მეტი რაკეტა გამოიყენა და ძირითადი სამიზნე იყო ენერგეტიკული ობიექტები და საცხოვრებელი სახლები კიევის, დნეპრის, ხარკოვის, სუმის, ოდესისა და სხვა რეგიონებში.
მისი თქმით, პუტინი უკრაინის ენერგოსისტემაზე დარტყმამდე ტემპერატურის დაცემას დაელოდა.
„პუტინი დაელოდა ტემპერატურის დაცემას, რათა გაეგრძელებინა გენოციდური თავდასხმა უკრაინელ ხალხზე.
არც აბუ-დაბიში ამ კვირაში მოსალოდნელმა დიპლომატიურმა ძალისხმევამ და არც შეერთებული შტატებისთვის მიცემულმა დაპირებებმა არ შეუშალა ხელი მას ყველაზე მკაცრ ზამთარში ჩვეულებრივი ადამიანების წინააღმდეგ ტერორის გაგრძელებაში.
ჩვენ საქმე გვაქვს ტერორისტებთან, რომლებიც უნდა აიძულონ, შეწყვიტონ ძალადობა“ – წერს უკრაინის საგარეო საქმეთა მინისტრი.
რუსეთის თავდასხმის შედეგად დაშავებულების რაოდენობა ზუსტდება. მსხვერპლის შესახებ ჯერჯერობით ინფორმაცია არ ვრცელდება.
უკრაინაში კვლავ ყინვაა მოსალოდნელი. სინოპტიკოსების ცნობით, ჩრდილოეთ უკრაინაში ტემპერატურა შესაძლოა -30°C-მდე დაეცეს.
___________________
ფოტოზე: ოდესა, 2026 წლის იანვარი. ფოტო: ევროპის პრესფოტო სააგენტო. EPA
![ბათუმში მეზღვაურთა საერთაშორისო დღე აღინიშნება, რისთვისაც ნახევარი მილიონი ლარი დაიხარჯება [ფოტო]](https://batumelebi.netgazeti.ge/wp-content/uploads/2026/06/11.png "ბათუმში მეზღვაურთა საერთაშორისო დღე აღინიშნება, რისთვისაც ნახევარი მილიონი ლარი დაიხარჯება [ფოტო]")
