ბათუმის მერიის ინფორმაციით, „ბათუმის სპორტული ცენტრის“ დირექტორმა უჩა აბრამიშვილმა თანამდებობა დატოვა და მის მოვალეობას სულხან აბულაძე შეასრულებს. ის ამ დრომდე აჭარის განათლებისა და სპორტის სამინისტროს სპორტის დეპარტამენტის პირველი მოადგილის პოზიციას იკავებდა.
სულხან აბულაძე დღეს, 26 იანვარს, ბათუმის მერმა, გიორგი ცინცაძემ წარუდგინა თანამშრომლებს, როგორც მოვალეობის შემსრულებელი.
უჩა აბრამიშვილი აჭარის განათლების სამინისტროს ახალგაზრდობის რეგიონული ცენტრის დირექტორის მოადგილედ დაინიშნა – ეს ინფორმაცია მან „ბათუმელებს“ თავად დაუდასტურა.
მერიის ინფორმაციით, დღეს, შეხვედრის ფარგლებში განიხილეს სპორტული ცენტრის მიმდინარე საქმიანობა, სამწვრთნელო და სასწავლო მიმართულებები, ასევე, სამომავლო გეგმები, რაც ინფრასტრუქტურის განვითარებასა და სპორტული სექციების გაძლიერებას საჭიროებს.
ამავე დროს, ბათუმის მერიაში რეორგანიზაციის პროცესი გრძელდება. კანონის შესაბამისად, რიგ თანამდებობებზე მერიას კონკურსის გამოცხადება მოუწევს, რიგ თანამდებობაზე კი მერი თავისი გადაწყვეტილებით ნიშნავს ხელმძღვანელებს.
რამდენიმე მუნიციპალური ორგანიზაციის ხელმძღვანელების შეცვლის შესახებ გასულ კვირას გავიგეთ.
მერს ჯერ კიდევ არ დაუნიშნავს ახალი ვიცე-მერი, ეს თანამდებობა ბათუმის მერიაში ვაკანტურია.
ბათუმის მერმა, გიორგი ცინცაძემ რეორგანიზაცია 9 იანვარს გამოაცხადა.
ფოტო: ბათუმის მერი გიორგი ცინცაძე, უჩა აბრამიშვილი და სულხან აბულაძე.
