რუსეთში, მოსკოვის ოლქის სერპუხოვის საქალაქო სასამართლომ რუსული ენისა და ლიტერატურის 65 წლის მასწავლებელს, ნატალია ტარანუშენკოს დაუსწრებლად მიუსაჯა შვიდი წლით თავისუფლების აღკვეთა რუსული არმიის შესახებ „ყალბი ინფორმაციის გავრცელების“ ბრალდებით.
მედიის ცნობით, გადაწყვეტილება ჯერ კიდევ 23 ივნისს იქნა მიღებული, თუმცა ამის შესახებ მხოლოდ გუშინ, 1-ელ ივლისს გახდა ცნობილი. სასამართლომ ქალს სამი წლით მასწავლებლად მუშაობაც აუკრძალა.
ნატალია ტარანუშენკოს წინააღმდეგ საქმე 2024 წლის ზაფხულში აღიძრა. დევნის მიზეზი იყო საკლასო საათი „სიკეთის გაკვეთილი“, რომელიც ნატალია ტარანუშენკომ ჯერ კიდევ 2022 წელს ჩაატარა მოსკოვის ოლქის ქალაქ პროტვინოს N1 სკოლაში.
გაკვეთილზე მასწავლებელმა სკოლის მოსწავლეებს უამბო უკრაინის ქალაქ ბუჩაში რუსული არმიის მიერ ჩადენილ დანაშაულებზე, აჩვენა რამდენიმე ვიდეო უკრაინული მედიიდან და უკრაინაში რუსეთის შეჭრას საერთაშორისო სამართლის დარღვევა უწოდა.
მოგვიანებით მასწავლებელი დაასმინეს სკოლის მე-8 კლასის მოსწავლეების მშობლებმა: უკრაინაში რუსეთის ომის მონაწილემ, არტემ ალექსანდროვმა და ბიზნესმენმა დიმიტრი ნაავგუსტმა, რომელიც რუსეთის ფრონტზე დახმარებას აგზავნის.
მასწავლებლის წინააღმდეგ შეტანილ საჩივარში მოსწავლეების მშობლებმა განაცხადეს, რომ ქალის სიტყვებმა „მათ შვილებს ფსიქოლოგიური ტრავმა და ფსიქიკური ტანჯვა მიაყენა“.
მალე ტარანუშენკომ რუსეთი დატოვა და რუსეთის შინაგან საქმეთა სამინისტრომ მასზე ძებნა გამოაცხადა.
2024 წლის ივლისში მასწავლებელი რუსეთის მოთხოვნით სომხეთში დააკავეს, მაგრამ მალევე გაათავისუფლეს.
