დღეს, 19 მარტს, სტამბოლში საპროტესტო აქციას მართავენ სტამბოლის უნივერსიტეტის სტუდენტები. ისინი აპროტესტებენ უნივერსიტეტის ადმინისტრაციის გადაწყვეტილებას რომლითაც სტამბოლის მერს, ექრემ იმამოღლუს დიპლომი გაუუქმეს.
ამ გადაწყვეტილებით ფაქტობრივად მოხდა ოპოზიციონერის დისკვალიფიკაცია საპრეზიდენტო არჩევნებიდან.
სტუდენტებმა მსვლელობა უნივერსიტეტის კაფეტერიიდან დაიწყეს სასწავლებლის მთავარი შესასვლელისკენ. სტამბოლის უნივერსიტეტის მთავარ ჭიშკართან პოლიციამ სტუდენტების შესაჩერებლად ბარიკადები მოაწყო, მათ შესაჩერებლად ასევე გამოიყენა წიწაკის სპრეი.
პოლიციის წინ მდგარი სტუდენტები ხმამაღლა სკანდირებდნენ – „პოლიციელო გაყიდე სიმითი, იცხოვრე ღირსეულად“.
სტუდენტები ბარიკადების გარღვევას ცდილობდნენ და ერთმანეთს ასე ამხნევებდნენ: “გადახტი, გადახტი, ვინც არ გადახტეს, ერდოღანი იყოს”. საბოლოოდ სტუდენტებმა ბარიკადების გარღვევა შეძლეს და უნივერსიტეტის ეზოში შევიდნენ.
აღსანიშნავია, რომ ყველა სპეცრაზმელს, რომელიც სტუდენტების წინააღმდეგ იყო მობილიზებული, თავზე ეხურა დანომრილი ჩაფხუტი, რომლითაც მათი იდენტიფიცირებაა შესაძლებელი.
დღეს, 19 მარტს, თურქეთის პოლიციამ ოპოზიციის ლიდერი, სტამბოლის მერი ექრემ იმამოღლუ „კორუფციისა და ტერორისტული კავშირების“ შესახებ გამოძიების ფარგლებში დააკავა.
ამასთან, თურქეთის პროკურატურამ 100 ადამიანის დაკავების ორდერი გასცა. მთავრობამ დაკეტა რამდენიმე გზა სტამბოლის ირგვლივ და ოთხი დღით აკრძალა აქციები, რათა თავიდან აიცილოს პროტესტი დაპატიმრებების შემდეგ.
დაკავებულთა შორისაა იმამოღლუს თანამებრძოლი მურატ ონგუნიც.
იმამოღლუ დააკავეს რესპუბლიკური სახალხო პარტიის (დაფუძნებულია მუსტაფა ქემალ ათათურქის მიერ) პრაიმერიზის წინ, რომელიც კვირას უნდა გამართულიყო და იგი პრეზიდენტობის კანდიდატად დაესახელებინა.
თურქეთში შემდეგი საპრეზიდენტო არჩევნები 2028 წელს არის დაგეგმილი, თუმცა ქვეყანაში ვადამდელი არჩევნების მოთხოვნით პროტესტი მიმდინარეობს.
„ჩვენ დიდი ტირანიის წინაშე ვდგავართ, მაგრამ მინდა იცოდეთ, რომ გულგატეხილი არ ვიქნები. მე მტკიცედ ვდგავარ და ვენდობი არა მხოლოდ სტამბოლის 16 მილიონ მცხოვრებელს, არამედ (თურქეთის) 86 მილიონ მოქალაქეს“, — თქვა იმამოღლუმ დაკავებამდე სოციალურ მედიაში გამოქვეყნებულ ვიდეოში.
მან თურქეთის ხელისუფლება„ ხალხის ნების უზურპაციაში“ დაადანაშაულა.
