დღეს, 20 იანვარს, ფოთის იზოლატორიდან გაათავისუფლეს „ბათუმელების“ ოპერატორი გურამ მურვანიძე, რომელსაც 8-დღიანი ადმინისტრაციული პატიმრობა ჰქონდა შეფარდებული.
გურამ მურვანიძე დააკავეს 12 იანვარს, ჟურნალისტური საქმიანობის შესრულებისას. მის საქმეში მოწმეები პოლიციელები იყვნენ, არ არსებობდა მტკიცებულება, რომ გურამ მურვანიძემ კანონი დაარღვია.
მეტიც, გურამ მურვანიძემ სასამართლო პროცესზე ტყუილში ამხილა მოწმე პოლიციელი, თუმცა, ამის მიუხედავად, მოსამართლე ირმა ტოგონიძემ გაიზიარა პოლიციელის ჩვენება და „ბათუმელების“ ოპერატორს რვადღიანი ადმინისტრაციული პატიმრობა შეუფარდა.
„გასაჩივრების შემდგომ ჩაგვბარდა სასამართლოს დასაბუთებული დადგენილება, სადაც სასამართლო მხოლოდ ერთი აბზაცით დადასტურებულად მიიჩნევს გურამის მიერ სამართალდარღვევის ჩადენას, ამასთან როგორ მივიდა სასამართლო ამ დასკვნამდე, არაფერია ნათქვამი, მოწმე პოლიციელების ურთიერთგამომრიცხავ ჩვენებზეც სრული დუმილია და არც საქმეში წარმოდგენილი ვიდეომტკიცებულებებია შეფასებული სასამართლოს მიერ.
დადგენილებაშივე რამდენიმე ადგილას გვხვდება სხვა დაკავებულების სახელები და გვარები, რაც გვაფიქრებინებს რომ სასამართლო ამ კატეგორიის საქმეებზე ხელმძღვანელობს ერთი შაბლონით“ – ამბობს მირზა მამულაძე, გურამ მურვანიძის ადვოკატი.
გურამ მურვანიძე დააკავეს „ბათუმელებისა“ და „ნეტგაზეთის“ დამფუძნებლისა და დირექტორის, მზია ამაღლობლის დაკავებიდან მეორე დღეს. გურამ მურვანიძის დაკავებაში მონაწილეობდა ბათუმის პოლიციის უფროსი ირაკლი დგებუაძე.
ნახეთ ვიდეო:
