მოსამართლე გიორგი გრატიაშვილმა დღეს, 2 აგვისტოს, დაზარალებული ზინაიდა ანტონიანის ჩვენება მოისმინა. საუბარია ჯგუფური ძარცვის საქმეზე, რაშიც ბრალი ედება გიორგი კაკაბაძეს და ხვიჩა კიწმარიშვილს. სასამართლო განხილვის დაწყებამდე, ბრალდებულების ნათესავებმა პროკურატურასთან საპროტესტო აქციები რამდენჯერმე გამართეს უკანონო წინასწარი პატიმრობის შეწყვეტის მოთხოვნით. პროტესტის საგანი საქმის ახალ გარემოებაა – მოპარული ნოუთბუქი დაზარალებულმა ქალებმა საკუთარ სახლში აღმოაჩინეს.
ზინაიდა ანტონიანის ჩვენების მიხედვით, ის 21 თებერვალს ადრე დილით დაბრუნდა სახლში, რა დროსაც მემედ აბაშიძის ქუჩაზე, იტალიური ეზოს საერთო ჭიშკარი ღია დახვდა: „კარს საღამოობით ვკეტავთ, გასაღები ვერ გადავატრიალე. გამიკვირდა, მაგრამ ეზოში შევედი. ეზოდან ორი ბიჭი გამორბოდა. ესენი იყვნენ ის ბიჭები…”, – თქვა მოწმემ და მოსამართლეს ბრალდებულებისკენ მიუთითა.
მოწმის თქმით, მას სახლში შეშინებული მეგობარი დახვდა, რომელმაც უთხრა, რომ გაძარცვეს. პოლიციელებს დაზარალებულებმა უთხრეს, რომ დაკარგული იყო ნოუთბუქი და ფული [სხვადასხვა ვალუტა, ჯამში დაახლოებით 100 ლარის ოდენობით]. მოწმეს არ დაუმალავს ისიც, რომ ნოუთბუქი, რომელიც მოპარული ეგონა, სახლშივე დაახლოებით ორი დღის შემდეგ იპოვა. “ამის შემდეგ ვნახეთ, რომ მოპარული იყო საათი და სუნამო. დავუკავშირდი პოლიციას და მივეცი ჩვენება”, – თქვა ზინაიდა ანტონიანმა.
ბრალდებულების ერთ-ერთი ადვოკატი, ბადრი ბერიძე ამბობს, რომ პოლიცია შეგნებულად ცდილობს “საქმის შეკერვას”, რადგან ორივე ბრალდებული წარსულში ძარცვისა და ქურდობის გამო იხდიდა სასჯელს. “ამ გზით სურს სამართალდამცველებს სტატისტიკის შექმნა. წინააღმდეგ შემთხვევაში, მინიმუმ გაუგებარია, რატომ შეიძლება მიედავო სუნამოს და საათის ძარცვას ადამიანებს, თუკი ის შეუმჩნევლად მოიპიარეს. ეს უკვე ქურდობის კვალიფიკაციაა და არა ძარცვის. ბრალდებულებმა მითხრეს და სასამართლოსაც მოუყვებიან, რომ მათ ეს გოგონები ღამის კლუბში გაიცნეს და შემდეგ სახლში გაყვნენ. დილით ნოუთბუქი გოგონებმა ვეღარ იპოვეს და ჩათვალეს, რომ ის ამ ბიჭებმა მოპარეს. საათი და სუნამო უკვე შეთხზული ამბავია, რადგან ეს ბიჭები უკვე ამოცნობილი ყავდათ დაზარალებულებს და ბრალი წაყენებული იყო” – უთხრა ბადრი ბერიძემ “ბათუმელებს”.
ბრალის დადასტურების შემთხვევაში, ბრალდებულებს 5-დან 8 წლამდე თავისუფლების აღკვეთა ემუქრებათ.
