დღეს, 10 ოქტომბერს, დილის 6 საათიდან რუსეთის შეიარაღებული ძალები უტევენ ქალაქ ავდიივკას დონეცკის ოლქში, უკრაინაში.
ავდიივკას სამხედრო ადმინისტრაციის ხელმძღვანელი ვიტალი ბარაბაში აცხადებს, რუსული ჯარები მასობრივ შეტევებს ახორციელებენ. ქალაქი დილიდან იბომბება ტანკებითა და არტილერიით, მისი თქმით, მძიმე ბრძოლა გრძელდება ქალაქის ჩრდილოეთით.
უკრიანული მედიის ცნობით, დაღუპული ან დაჭრილი მოქალაქეების შესახებ ინფორმაცია ჯერ არ ვრცელდება.
უკრაინული გამოცემა, „უკრაინსკა პრავდა“ წყაროებზე დაყრდნობით წერს, რომ ოკუპანტები ზედიზედ მესამე დღეა უტევენ ქალაქს.
ავდიივკაზე თავდასხმის შესახებ წერენ ტელეგრამის პრორუსულ არხებზეც, სადაც აღნიშნავენ, რომ რუსული არმია ახორციელებს უკრაინული პოზიციების ყველაზე მასიურ დაბომბვას ბოლო თვეების განმავლობაში.
