რუსეთის ფედერაციის შინაგან საქმეთა სამინისტრომ უკრაინის პრეზიდენტის აპარატის ყოფილი მრჩეველი ოლექსეი არესტოვიჩი ძებნილთა სიაში შეიყვანა.
ამის შესახებ რუსული მედია წერს ოფიციალურ წყაროებზე დაყრდნობით.
„არესტოვიჩი ოლექსეი ნიკოლაევიჩი. უკრაინელი. დაბადების ადგილი: საქართველოს სსრ, წითელწყარო. იძებნება სისხლის სამართლის კოდექსით”, – ნათქვამია მონაცემთა ბაზაში.
რუსული სახელისუფლებო მედია „ტასი“ წერს, რომ 2022 წლის 12 აპრილს ოკუპირებული დონეცკის სეპარატისტული ხელისუფლების პროკურატურამ არესტოვიჩის წინააღმდეგ სისხლის სამართლის საქმე აღძრა ექსტრემისტული აქტივობის მოწოდების გამო. საუბარია არესტოვიჩის მოწოდებაზე, უკრაინის მოსახლეობას წინააღმდეგობა გაეწია რუსული ოკუპაციისთვის.
უკრაინის პრეზიდენტის აპარატის მრჩევლის პოსტი არესტოვიჩმა 2023 წლის იანვარში დატოვა. გადადგომა უკავშირდებოდა მისსავე გადაუმოწმებელ განცხადებას დნეპრში საცხოვრებელი კორპუსის რუსული რაკეტით დანგრევის გარემოებების შესახებ.
