დღეს 11 სექტემბერს, მთავრობის სხდომაზე ირაკლი ღარიბაშვილმა განაცხადა, რომ სტუდენტების სტიპენდიები გაიზრდება.
„დღეიდან ყოველ სასწავლო წელს 2 500-ის ნაცვლად 5 000 წარმატებული, მაღალი აკადემიური მოსწრების მქონე, ნიჭიერი სტუდენტი მიიღებს, 150 ლარის მაგივრად 300 ლარიან სტიპენდიას“- თქვა ღარიბაშვილმა.
მან ამავე სხდომაზე ახსენა წინა ხელისუფლება და აღნიშნა, რომ ყოფილი ხელისუფლების წარმომადგენლები, „მათ შორის ყოფილი პრეზიდენტი“, შვილებს ბიუჯეტიდან უფინანსებდა სწავლას.
მისი თქმით, „ეს არის განსხვავება“ წინა და ახლანდელ ხელისუფლებას შორის.
სხდომაზე ირაკლი ღარიბაშვილს არაფერი უთქვამს საკუთარი შვილის აშშ-ში გასამგზავრებლად სამთავრობო თვითმფრინავის არამიზნობრივ გამოყენებაზე.
„ნოდარ მელაძის შაბათის“ ინფორმაციით, რომელსაც არც საქართველოს მთავრობაში უარყოფენ, პრემიერ-მინისტრმა ირაკლი ღარიბაშვილმა სამთავრობო თვითმფრინავი პირადი ვიზიტისთვის გამოიყენა.
~მან უფროსი შვილი, 18 წლის ნიკოლოზ ღარიბაშვილი ჯერ მიუნხენში ჩაიყვანა სამთავრობო თვითმფრინავით, შემდეგ კი ამერიკის შეერთებულ შტატებისკენ გზა სამგზავრო თვითმფრინავით გააგრძელა.
ოპოზიციაში მიიჩნევენ, რომ ღარიბაშვილი სახელმწიფო თვითმფრინავის გამოყენების გამო უნდა გადადგეს, ხოლო არასამთავრობო სექტორში გამოძიების დაწყების აუცილებლობაზე საუბრობენ.
