ფიჭვნარის ბერძნულ და კოლხურ სამაროვნებზე ელინისტური ეპოქის არტეფაქტები აღმოაჩინეს.
აღმოჩენებს შორისაა ოქროსა და ბრინჯაოს სამკაულები, მინისა და მინისებური პასტის მძივები და მძივსაკიდები. ასევე, თიხის ჭურჭელი და სააღაპო მოედნები [მიცვალებულის მოსახსენებელი პურისჭამა].
როგორც ექსპედიციის ხელმძღვანელი, ამირან კახიძე „ბათუმელებთან“ ამბობს, წელს მე-60 გათხრა მიმდინარეობდა ფიჭვნარის სამაროვნებზე.
„ჩვენს ერამდე ძვ.წ-აღ-ის მეხუთე საუკუნის ბერძნული ნეკროპოლის ტერიტორიაზე შევისწავლეთ ადრეული სამარხები, ეს არის მეხუთე საუკუნის მეორე მეოთხედი.
გვაქვს არაჩვეულებრივი არტეფაქტები – ოქროს საყურე რგოლები ბეჰემოთის თავის გამოსახულებით, კოლხური კერამიკული წარმოების შედევრი, – საღვინე ჭურჭელი მდიდარი ორნამენტაციით. არის ასევე სხვა მონაცემებიც.
ჩანს, რომ სამაროვანს საკმაოდ დიდი ტერიტორია უკავია.
ფიჭვნარის სამაროვნების ახალი აღმოჩენები
მეორე ობიექტი გახლდათ ადგილობრივი მოსახლეობის კოლხური სამაროვანი, რომელიც წარმოადგენს მეხუთე და ელინისტური ხანის სამაროვნების შემადგენელ ნაწილს.
ახალი აღმოჩენების მიხედვით, ძველი წ-აღ-ის მეოთხე საუკუნეში ჩანს მჭიდრო კონტაქტები ათენთან. ვხედავთ კოლხებისა და ბერძნების კულტურების თავისებურ შერწყმას. მაგალითად, ჩანს, რომ კოლხებს ბერძნებისგან გადაუღიათ აღაპის ანუ ე.წ. ქელეხის შესრულების რიტუალი.
განსაკუთრებით მდიდარი მასალები აღმოჩნდა ელინისტური ხანის მესამე სამაროვანზე. ესენია: კოლხური მონეტები, თიხის ჭურჭელი, სააღაპო მოედნები, ოქროს ნაკეთობანი, რაც ასევე გვაჩვენებს, რომ ელინიზმის ეპოქაში ბერძნულის კვალდაკვალ ძველი კოლხეთი ამყარებს კონტაქტებს ელინისტური ხანის სახელმწიფოებთან, რომლებიც წარმოიქმნენ ალექსანდრე მაკედონელის გარდაცვალების შემდეგ“, – ამბობს ამირან კახიძე.
ამირან კახიძის თქმით, წლევანდელი გათხრების მთავარი მიზანი გახლავთ ის, რომ მომავალ წელს ბათუმში ტარდება პონტოს ლიმესის საერთაშორისო კონფერენცია და კონფერენციის მსოფლიო მონაწილეები ერთ დღეს ფიჭვნარის ამ უნიკალური აღმოჩენების დათვალიერებას დაუთმობენ.
