უკრაინის შეიარაღებული ძალების გენერალური შტაბის ცნობით, უკრაინელმა დამცველებმა რუსეთის საოკუპაციო ძალებს ანდრეევკას სამხრეთით, ბახმუტის რაიონში მდებარე პოზიციებიდან აიძულეს უკან დაეხიათ.
„ბახმუტის მიმართულებით ჩვენი ჯარები აგრძელებენ შეტევით ოპერაციებს ქალაქ ბახმუტის სამხრეთით.
თავდაცვის ძალების შეტევისას მტერი იძულებული გახდა, პოზიციებიდან უკან დაეხია ანდრეევკას სამხრეთით და უშედეგოდ შეეცადა აღადგინა დაკარგული პოზიციები კლეშჩეევკას ჩრდილოეთით და დასავლეთით, ასევე, კურდიუმოვკას ჩრდილო-დასავლეთით.
მძიმე ბრძოლები გრძელდება“ – იუწყება უკრაინის გენშტაბი.
ასევე, გენშტაბის ცნობით, უკრაინის თავდაცვის ძალები აგრძელებენ შეტევით ოპერაციას მელიტოპოლისა და ბერდიანსკის მიმართულებებზე და მაგრდებიან მიღწეულ პოზიციებზე.
დღეს, 2 აგვისტოს, აშშ-ში, პენტაგონის სპიკერმა, გენერალმა პატრიკ რაიდერმა ბრიფინგზე აღნიშნა, რომ უკრაინის კონტრშეტევა იქნება მძიმე და ხანგრძლივი და თქვა, რომ ვაშინგტონი გააგრძელებს უკრაინის მხარდაჭერას მანამ, სანამ უკრაინას ეს დასჭირდება.
___________
ფოტო: უკრაინის გენერალური შტაბი
