საქართველოში ღვიძლის გადანერგვის ოპერაცია სრულად (120 000 ლარით) დაფინანსდება. ფინანსდება როგორც დიაგნოსტიკის, ასევე ოპერაციის ხარჯები.
აქამდე მოქმედი სახელმწიფო პროგრამით, ღვიძლის ტრანსპლანტაცია დადგენილი ტარიფის ფარგლებში ფინანსდებოდა არა უმეტეს 70 000 ლარით, პაციენტის თანაგადახდის წილი კი 50 000 ლარს შეადგენდა.
აჭარის ჯანდაცვის სამინისტროს პროგრამით, გასული წლიდან ღვიძლის გადანერგვის ოპერაცია ადგილობრივ პაცენტებს 80 000 ლარით უფინანსდებოდა, დამატებით 30 000 ლარს მათთვის ბათუმის მერია გამოყოფდა, ხოლო აჭარის სხვა მუნიციპალიტეტებში რეგისტრირებული მოქალაქეებისთვის 110 000 ლარს მთლიანად აჭარის ჯანდაცვის სამინისტრო გასცემდა.
ღვიძლის ტრანსპლანტაციის კომპონენტს თანაგადახდის წილი მთლიანად მოეხსნა და ჯანდაცვის სამინისტრო მომსახურებას ახლა სრულად – 120 000 ლარით დააფინანსებს.
