ბათუმის ბულვარის ადმინისტრაციამ ზღვასთან ახლოს რამდენიმე ნაკვეთის საიჯარო წესით გასასხვისებლად აუქციონი გამოაცხადა.
ადმინისტრაცია ასხვისებს 1429 კვ. მეტრ ფართობს და მასზე დამაგრებულ შენობას პლაჟზე, სადაც ბოლო წლებში კლუბი „სოჰო“ ფუნქციონირებდა. შენობის ფართობი 374.63 კვ. მეტრია, აქ არის ასევე ორი მცირე ზომის დამხმარე შენობაც.
მთავარი შენობა 374.63 კვ.მეტრია, მიწის ნაკვეთი – 1429 კვ.მეტრი
აუქციონში გამარჯვებული ამ ქონებას, საიჯარო წესით, 2024 წლის 1-ელ იანვრამდე მიიღებს. ქონების საწყისი ფასი 89 000 ლარია, ბიჯი – 2670 ლარი.
აუქციონის პირობების მიხედვით, საბოლოო სარგებლობის საფასური აუქციონში გამარჯვებულმა ხელშეკრულების გაფორმებამდე სრულად უნდა გადაიხადოს, საიჯარო ხელშეკრულება კი გამარჯვებულის გამოვლენიდან 7 დღეში უნდა გაფორმდეს.
აუქციონით გათვალისწინებული პირობების მიხედვით, მოიჯარე ვალდებული იქნება მეიჯარის მოთხოვნის შემთხვევაში 2023 წლის საზაფხულო სეზონის განმავლობაში მოაწყოს არანაკლებ ორი ღონისძიება ბავშვებისათვის, რაშიც იგულისხმება ბავშვების გართობა ანიმატორის საშუალებით, ნაყინითა და უალკოჰოლო გამაგრილებელი სასმელებით გამასპინძლება და ასევე, საცურაო აუზით სარგებლობა.
ბულვარის ადმინისტრაციამ აუქციონი გამოაცხადა ასევე შენობისა და მიწის ნაკვეთის გასხვისებაზე, სადაც კლუბი „სექტორი 26“ ფუნქციონირებდა. ამ შემთხვევაში გასასხვისებელი ტერიტორია 2000 კვ.მეტრია, ხოლო შენობა – 961.2 კვ.მეტრია.
აუქციონის პირობებში მითითებული ინფორმაციით ეს ქონება 2024 წლის 1-ელ იანვრამდე ვადით გასხვისდება
ქონების საწყისი ფასი 92 00 ლარია, ბიჯი – 2760 ლარი. აუქციონი 15 მაისს გამოცხადდა და 22 მაისს უნდა დასრულდეს.
გასულ წელს ეს ორი ქონება ბათუმის ბულვარის ადმინისტრაციამ ელექტრონული აუქციონით, მაღალი კონკურენციის პირობებში, 421 910 ლარად გაასხვისა.
