გაერთიანებული სამეფოს დაზვერვა 26 იანვრის ანგარიშში ბელარუსში გაწვრთნილი მე-2 გვარდიის მოტომსროლელი დივიზიის უკრაინაში გაგზავნის შესაძლებლობას მიმოიხილავს.
როგორც ანგარიშში ვკითხულობთ, სავარაუდოდ, ამ დივიზიის წვრთნები ბელარუსში უკვე დასრულდა და მისი დიდი ნაწილი უკვე გადაყვანილია რუსეთში, საიდანაც ჯარისკაცები, თითქმის დარწმუნებით შეიძლება ითქვას, რომ უკრაინაში, საბრძოლო მოქმედებებში ჩასართავად გაიგზავნებიან.
ბელარუსი რუსეთის სამხედრო ძალებისათვის წვრთნებს 2022 წლის შემოდგომიდან ატარებს. როგორც ბრიტანული დაზვერვა გასულ ანგარიშებში წერდა, ეს დიდი ალბათობით რუსეთის დიდი დანაკარგების გამო ხდება.
დივიზია რუსეთის პირველი გვარდიის სატანკო არმიის შემადგენლობაში შედის, რომელმაც ომის დასაწყისში მნიშვნელოვანი დანაკარგები განიცადა. ბრიტანული დაზვერვა 2022 წლის შემოდგომაზე ამ მძიმე დანაკარგებზე საუბრისას აღნიშნავდა, რომ „პირველი სატანკო არმია იყო რუსეთის ერთ-ერთი პრესტიჟული არმია, რომელსაც მოსკოვის დაცვა და NATO-სთან ომის შემთხვევაში კონტრშეტევების წარმოება ევალებოდა“.
გაერთიანებული სამეფოს დაზვერვის უახლესი მონაცემების თანახმად, დივიზია ამ ეტაპზე ძირითადად მობილიზაციისას აყვანილი პერსონალითაა დაკომპლექტებული და საცავებიდან გამოტანილი მოძველებული აღჭურვილობით ოპერირებს, რაც მის საბრძოლო ეფექტურობას ლიმიტირებულს ხდის, მიუხედავად რამდენიმეკვირიანი წვრთნებისა.
„არსებობს რეალური შესაძლებლობა, რომ რუსეთის სხვა ქვედანაყოფებიც იგზავნება ბელარუსში წვრთნებისთვის და რომ რუსეთი გააგრძელებს ამ მოდელს უკრაინაში თავისი ძალების შენარჩუნებისთვის ქვედანაყოფების განახლებისა და მომზადებისთვის“, – ვკითხულობთ ბრიტანული დაზვერვის ანგარიშში.
