დღეს, 14 იანვარს, რუსმა ოკუპანტებმა უკრაინაზე მასირებული სარაკეტო იერიში მიიტანეს. რაკეტა დნიპროში მაღალსართულიან საცხოვრებელ კორპუსს მოხვდა. შენობის ნანგრევებიდან უკვე ამოიყვანეს 15 ადამიანი. დაღუპულებისა და დაშავებულების შესახებ ინფორმაცია ჯერჯერობით ზუსტდება – სამაშველო ოპერაცია ჯერ კიდევ გრძელდება. ამის შესახებ უკრაინული მედია წერს.
რუსეთის სარაკეტო თავდასხმების გამო უკრაინაში, დღეს მთელი დღეა განგაშია. 2023 წლის დადგომის შემდეგ რუსებმა დღეს პირველად მიიტანეს უკრაინაზე მასშტაბური მასირებული სარაკეტო იერიში.
„ვითარება საკმაოდ დაძაბულია, რადგან მტერი მუდმივად ამატებს სამხედრო ძალებს“, – ამის შესახებ ოპერატიული სარდლობა „სამხრეთის“ პრესცენტრის ხელმძღვანელმა, ნატალია გუმენიუკმა განაცხადა.
მისი თქმით, მტერი ურტყამს კრიტიკულ ინფრასტრუქტურას და მიმდინარეობს მძიმე ბრძოლები.
„რუსი ოკუპანტები აფართოებენ ძალებს შავ ზღვაში. ამჟამად მოწინააღმდეგის საბრძოლო ფლოტი შედგება 5 ხომალდისგან, რომლებზეც განთავსებულია და მზადყოფნაშია „კალიბრის“ ტიპის 36 რაკეტა“, – აცხადებს ოპერატიული სარდლობა „სამხრეთის“ პრესცენტრის ხელმძღვანელი.
„სამხრეთის“ სარდლობის მიერ გავრცელებული ინფორმაციის თანახმად, საჰაერო თავდაცვის ძალებმა რუსული რაკეტების ჩამოგდება მოახერხეს, თუმცა არ აზუსტებენ ჩამოგდებული რაკეტების რაოდენობას, რადგან ეს ინფორმაცია შეიძლება მტერმა თავის სასიკეთოდ გამოიყენოს.
უკრაინული მედიის ინფორმაციით, დღეს რუსეთმა გამოიყენა ბალისტიკური რაკეტები. უკრაინის საჰაერო თავდაცვის ძალებს კი არ გააჩნიათ ეფექტური საშუალებები ამ რაკეტების აღმოსაჩენად და გასანადგურებლად.
მედიის ინფორმაციით, ექსპერტებს ჯერ არ დაუდგენიათ ზუსტად რა ტიპის რაკეტები გამოიყენა რუსეთმა დღეს, 14 იანვარს, უკრაინის დედაქალაქის დასაბომბად. მათი ვარაუდით, ეს არის ბალისტიკური რაკეტა ან С-300, რომელიც ბალისტიკური ტრაექტორიით დაფრინავს.
