ეს იქნება პირველი შემთხვევა ბოლო ათ წელში, როდესაც ვლადიმერ პუტინი წლის შემაჯამებელ ღონისძიებასა და სატელევიზიო მიმართვას არ გამართავს. გაერთიანებული სამეფოს დაზვერვის 13 დეკემბრის მონაცემები, სწორედ ამ გადაწყვეტილებას მიმოიხილავს.
როგორც ბოლო ანგარიშშია განმარტებული, უჩვეულო გადაწყვეტილების მიზეზი სავარაუდოდ „არასანქცირებული შეკითხვებისგან“ თავის დაზღვევის ექსტრემალური მცდელობაა.
რუსეთის პრეზიდენტისთვის ტრადიცია იყო წლის ბოლოს შემაჯამებელი კონფერენციის გამართვა და სატელევიზიო მიმართვა, ისევე როგორც შესაბამისი ყოველწლიური ღონისძიება.
ბრიტანული დაზვერვის შეფასებით, ამას პუტინის საჯარო კომუნიკაციების კალენდარში უმნიშვნელოვანესი ადგილი უკავია, რამდენადაც, თავისი მოჩვენებითი პატიოსნებისა და საზოგადოებისადმი ანგარიშვალდებულების დემონსტრირების შესაძლებლობას აძლევს.
12 დეკემბერს კრემლმა დაადასტურა, რომ წელს ტრადიციული პრესკონფერენცია და ღონისძიება არ გაიმართება.
გაერთიანებული სამეფოს დაზვერვის სამსახურის შეფასებით, მიუხედავად იმისა, რომ, როგორც წესი, პრესკონფერენციაზე ყველა შეკითხვა წინასწარაა შეთანხმებული, სავარაუდოდ, მისი გაუქმების მიზეზი რუსეთში ანტისაომარი განწყობების გავრცელებასთან დაკავშირებულ მზარდ შიშს უკავშირდება.
„თითქმის დადასტურებით შეიძლება ითქვას, რომ კრემლის მაღალჩინოსნები ექსტრემალურად ფრთხილობენ, პუტინის მონაწილეობით ჩატარებული ნებისმიერი ღონისძიების „სპეციალური სამხედრო ოპერაციის“ შესახებ არასანქცირებული დისკუსიით ჩაშლის შესაძლებლობაზე“, – ვკითხულობთ ბრიტანული დაზვერვის 13 დეკემბრის ანგარიშში.
