10 დეკემბერს, გვიან ღამით, უკრაინის დამცველებმა ოკუპირებულ ქალაქ მელიტოპოლში დაარტყეს ბაზას – „პრივალ ოხოტნიკა“, სადაც, სავარაუდოდ კადიროველებს დასასვენებელი ადგილი ჰქონდათ მოწყობილი. დაღუპულებს შორის სავარაუდოდ არის მურად საიდოვი – ოკუპირებული ზაპორჟიეს რეგიონის „ზედამხედველი“ რამზან კადიროვისგან.
ოკუპირებული მელიტოპოლის მერის, ივან ფედოროვის თქმით, წუხელ, გვიან ღამით, მელიტოპოლში დაახლოებით 200 ოკუპანტი გაანადგურეს.
ტელეგრამარხებში გავრცელებული ვიდეოების მიხედვით, ბაზაზე მყოფების უმრავლესობა ან დაიჭრა ან დაიღუპა.
ადგილობრივები სოციალურ ქსელებში წერდნენ, რომ შემთხვევის ადგილზე, სასწრაფო სამედიცინო მანქანები მელიტოპოლის ყველა კუთხიდან მოდიოდა. ასევე წერდნენ იმაზე, რომ დაჭრილები ყირიმშიც კი გადაიყვანეს, რადგან მელიტოპოლის საავადმყოფოებში ადგილები აღარ იყო.
უკრაინული მედიის ინფორმაციით, მსგავს ელიტური დასასვენებელი ბაზები რიგითი ჯარისკაცებისთვის ნაკლებადაა ხელმისაწვდომი. აქედან გამომდინარე ვარაუდობენ, რომ დაჭრილ-დაღუპულების უმრავლესობა ოფიცერია. დასასვენებელ ბაზას, სავარაუდოდ HIMARS-ებით დაარტყეს.
წუხელვე მელიტოპოლში უკრაინის დამცველებმა კიდევ ერთ ბაზას დაარტყეს – მედიის ინფორმაციით, განადგურებულია ოსების სამხედრო ბანაკი და შესაძლოა მათთან ერთად დაიღუპა მსახიობი სოსლან ფიდაროვი.
მედიის ინფორმაციით, უკრაინის დამცველებმა წუხელ დაბომბეს 58-ე არმიის მე-19 მოტომსროლელი დივიზიის ერთ-ერთი ქვედანაყოფი (ვლადიკავკაზი, ჩრდილოეთ ოსეთი). წინასწარი მონაცემებით, უკრაინელებმა ოკუპანტებს ამჯერადაც HIMARS-ებით დაარტყეს.
რაც შეეხება მსახიობ სოსლან ფიდაროვს, ის ოკუპირებულ ზაპოროჟიეში „ჰუმანიტარული მისიით“ – საოკუპაციო ჯარების მხარდასაჭერად ცოტა ხნის წინ ჩავიდა.
მურად საიდოვისა და სოსლან ფიდაროვის ლიკვიდაციაზე რუსულ მხარეს ჯერ კომენტარი არ გაუკეთებია.
___
მთავარი ფოტო: მელიტოპოლი. ხანძარი „პრივალ ოხოტნიკაში“. დასასვენებელ ბაზას სავარაუდდ HIMARS-ით დეარტყეს.
