უკრაინის რადის თავდაცვის კომიტეტის თავმჯდომარის მოადგილე, გენერალ-ლეიტენანტი მიხაილო ზაბროდსკი მიიჩნევს, რომ რუსეთის ჯარები, რომლებიც ახლა ხერსონის ოლქში არიან, ხერსონის დეოკუპაციის შემდეგ კრემლმა შესაძლოა ზაპოროჟიესა და სუმის ოლქებისკენ გადაისროლოს.
მისი თქმით, ამ მანევრით რუსეთი ეცდება, 2023 წლისთვის ამ ტერიტორიებზე შექმნას ძლიერი დანაყოფები, რომლებიც შემდეგში დნეპრის მარცხენა სანაპიროზე უკრაინის არმიის ალყაში მოქცევას მოახერხებენ.
საკუთარი პროგნოზის შესახებ ზაბროდსკი „უკრინფორმზე“ გამოქვეყნებულ ბლოგში წერს.
„სწორედ ახალშექმნილი დაჯგუფებების დახმარებით რუსები ეცდებიან, ერთდროულად შეუტიონ სუმა-პოლტავა-დნეპრისა და ზაპოროჟიე-დნეპრის მიმართულებებს. პარალელურად, დონბასში მყოფი რუსეთის არმია ეცდება, უკრაინის ძალები ამ რეგიონში შეაკავოს და მათ სხვა მიმართულებებზე ბრძოლის საშუალება არ მისცეს,“ – წერს ზაბროდსკი.
გენერალი განმარტავს, რომ რუსეთის ამგვარი ქმედებების მიზანი ასევე შეიძლება იყოს უკრაინის იძულება, კრემლის პირობებით დათანხმდეს მოლაპარაკებებს.
ზაბროდსკი დასძენს, რომ ამ გეგმას ოკუპანტი არმიის სარდლობა ჯერ კიდევ გაზაფხულზე განიხილავდა, ამიტომაც ის უკრაინის შეიარაღებული ძალებისთვის სიახლე არ იქნება.
კომიტეტის თავმჯდომარის მოადგილის თქმით, არ არის გამორიცხული, რუსებმა გარკვეული დასკვნები გააკეთონ უკვე წარსული მარცხიდან და მომავალში დიდი ქალაქების დაკავების ნაცვლად საგზაო მაგისტრალები და ის ლოგისტიკური გზები დაიკავონ, რომლებიც უკრაინის შეიარაღებული ძალების აღმოსავლეთ მიმართულების მომარაგებისთვის კრიტიკულად მნიშვნელოვანია.
ზაბროდსკი აღნიშნავს, რომ უკრაინამ უკვე დაიწყო ამ ორ მიმართულებაზე თავისი ჯარების გაძლიერება, თუმცა მისი აზრით, რუსეთის შესაძლო გეგმასთან დასაპირისპირებლად უკრაინას საგანგებო დანაყოფების შექმნაც მოუწევს. ამისთვის უკრაინას ცოცხალი ძალის გარდა დასჭირდება 600-მდე ტანკი, 1100-მდე ჯავშანტრანსპორტიორი, ასევე ქვეითი ჯარის საბრძოლო მანქანები და 500 ერთეული არტილერია.
