ოკუპირებულ მარიუპოლში მოსახლეობას საკვების საფასურად ალაგებინებენ ქალაქის ქუჩებს – ამის შესახებ მარიუპოლის მერის მრჩეველი, პიოტრ ანდრიუშენკო წერს ტელეგრამზე.
„მიუხედავად დაპირებისა და ნაწილობრივ გადახდისა, მარიუპოლელები აგრძელებენ ქალაქის ქუჩების დასალაგებლად მუშაობას საჭმლის მისაღებად. ერთი თეფში ფაფა და ბოთლით წყალი – ერთადერთი გარანტირებული საფასურია მძიმე სამუშაოსთვის სიცხეში.
მარიუპოლის საოკუპაციო ხელისუფლებისთვის გამოყოფილია თანხა 900 მუშისთვის 12 ათასი რუბლის [დაახლოებით 6 ათასი გრივნა] გადასახდელად, ადგილობრივი მცხოვრებლებისთვის. რეალურად ამ სამუშაოებში ჩართულია 3-4-ჯერ მეტი ადამიანი. სწორედ ასე ქმნის ივაშენკოს [რუსეთის საოკუპაციო ძალების მიერ დანიშნული ქალაქის მერი] ოკუპაციური ადმინისტრაცია სურათს რუსებისთვის ქალაქის მართვის საკუთარი შესაძლებლობების შესახებ. ამავე დროს ის და მისი ოჯახი ჯერ ისევ იპარავს არა მხოლოდ ჰუმანიტარულ ტვირთს და დიზელის საწვავს რუს ჯარისკაცებთან ერთად, არამედ მუშების ხელფასებისთვის განკუთვნილ ფულსაც,“ – წერს ანდრიუშენკო.
მარიუპოლის მერის მრჩეველი, პიოტრ ანდრიუშენკო, ხშირად აქვეყნებს ინფორმაციას მარიუპოლში მიმდინარე სიტუაციის შესახებ ტელეგრამზე ფოტო და ვიდეომასალასთან ერთად. ძირითად შემთხვევაში მის მიერ გავრცელებული ინფორმაციის გადამოწმება შეუძლებელია, რადგან ინფორმაცია შეეხება რუსეთის არმიის მიერ ოკუპირებულ ქალაქში მიმდინარე მოვლენებს.
ქალაქი მარიუპოლი მთლიანად ოკუპირებულია. უკრაინული მედიის ცნობით, განადგურებულია დაახლოებით 85 ათასი ადამიანის საცხოვრებელი სახლი, დაღუპულთა ზუსტი რაოდენობა უცნობია. წინასწარი გათვლებით, მარიუპოლში დაახლოებით 22 ათასი მშვიდობიანი მოქალაქე დაიღუპა. ქალაქში აღარ არის კანალიზაცია და წყლის დეფიციტია, რის გამოც შიშობენ, რომ მოსალოდნელია ქოლერის ეპიდემიის გავრცელება.
