კრემლმა პირველი კომენტარი გააკეთა სარაკეტო თავდასხმაზე, რომლის შედეგადაც, ოდესის ოლქში, პირველადი მონაცემებით, 20 ადამიანი დაიღუპა. რუსეთის პრეზიდენტის პრესსპიკერმა, დიმიტრი პესკოვმა, ამჯერადაც ვლადიმერ პუტინის სიტყვები გაიმეორა.
„მინდა, კიდევ ერთხელ შეგახსენოთ რუსეთის პრეზიდენტისა და მთავარსარდლის, ვლადიმერ პუტინის სიტყვები, რომ რუსეთის შეიარაღებული ძალები „სპეციალური სამხედრო ოპერაციის“ ფარგლებში სამოქალაქო სამიზნეებსა და სამოქალაქო ინფრასტრუქტურაზე არ მუშაობენ,“ – განაცხადა პესკოვმა ბრიფინგზე და დასძინა, რომ რუსეთის სამიზნე მხოლოდ „სამხედრო შეიარაღების საწყობები და ის საწარმოებია, სადაც ტექნიკას ამზადებენ და არემონტებენ. ასევე, საბრძოლო მასალების საწყობები და დაქირავებული მებრძოლების საწვრთნელი ადგილები“.
მეტი დეტალის დასაზუსტებლად, პესკოვმა ჟურნალისტებს ურჩია, რუსეთის თავდაცვის სამინისტროს მიმართონ.
პირველი ივლისის ღამით რუსეთმა Х-22 რაკეტებით დაარტყა მრავალსართულიან საცხოვრებელ კორპუსს და ორ დასასვენებელ კომპლექსს სერგეევკაში, ოდესის ოლქში.
კორპუსის ერთი სადარბაზო მთლიანად ჩამოინგრა. დღის 13.00 საათის მონაცემებით, დაიღუპა 20 და დაიჭრა 40 ადამიანი.
18-მდე გაიზარდა მსხვერპლის რაოდენობა კრემენჩუგში, სადაც 27 ივნისს რუსეთმა სარაკეტო იერიში მიიტანა სავაჭრო ცენტრზე. დაშავებულთა რიცხვი 60-ს აღწევს.
უკრაინის ხელისუფლების ინფორმაციით, მაშინ, როცა რუსეთის არმიამ სავაჭრო ცენტრი დაბომბა, იქ 1 000-მდე ადამიანი იმყოფებოდა. პრეზიდენტმა ვოლოდიმირ ზელენსკიმ სავაჭრო ცენტრზე იერიშს ტერორისტული აქტი უწოდა.
მთავარი ფოტო: დიმიტრი პესკოვი
