პრემიერ-მინისტრი ბორის ჯონსონი პირობას დებს, რომ დიდი ბრიტანეთი „მტკიცედ“ გააგრძელებს უკრაინის მხარდაჭერას. ამის შესახებ The Independent0-ი მის ოფიციალურ წარმომადგენელზე დაყრდნობით წერს.
ჯონსონი აცხადებს, რომ პარტნიორებისგან პუტინისთვის ნებისმიერი დათმობა „კატასტროფის“ მომტანი იქნება.
„ჩვენ არავის უნდა მივცეთ უფლება, დაიჯეროს, რომ პუტინისთვის დათმობა რამე შედეგს მოიტანს კატასტროფის გარდა,“ – აქვეყნებს ჯონსონის ციტატას გამოცემა.
პრემიერი მიიჩნევს, რომ რუსეთი და მისი მოკავშირეები კომპრომისს მიიღებენ როგორც ჯილდოს უკრაინაში დაწყებული დაუსაბუთებელი სამხედრო აგრესიისთვის.
ბორის ჯონსონმა უკრაინისთვის დამატებითი პოლიტიკური, სამხედრო და ფინანსური დახმარების პირობაც დადო.
მანამდე ბრიტანეთის პრემიერმა დაასახელა ოთხი ნაბიჯი, რომლებიც, მისიც აზრით, რუსეთის აგრესიისგან დასაცავად უკრაინის შესაძლებლობებს გაზრდის: შეიარაღების მიწოდების დაჩქარება, უკრაინის სახელმწიფოს სიცოცხლისუნარიანობის მხარდაჭერა, უკრაინული ექსპორტისთვის ალტერნატიული მარშრუტების შექმნა და და ხორბლის ექსპორტის აღდგენა.
გუშინ ცნობილი გახდა, რომ დიდმა ბრიტანეთმა უკრაინისთვის შეიძინა 20 ერთეული M109 ჰაუბიცა, რომელიც 15-30 კილომეტრზე წუთში 4 ჭურვს ისვრის და შეუძლია ცოცხალი ძალის, ჯავშანტექნიკისა და თანამედროვე ტანკების განადგურება.
მთავარი ფოტო: ბორის ჯონსონი და ვოლოდიმირ ზელენსკი/ფოტო: President.gov.ua
