კომპანია „აჭარისწყალი ჯორჯიას“ აღმასრულებელი დირექტორი, რაკეშ ნაიკი, ენერგეტიკულ კონფერენციას „Renewable Georgia 2022“ დაესწრო. ღონისძიებას კერძო და საჯარო სექტორის, საფინანსო ინსტიტუტების, სხვადასხვა ორგანიზაციის წარმომადგენლები დაესწრნენ. რაკეშ ნაიკმა კონფერენციის მონაწილეებს გაუზიარა „შუახევიჰესის“ გამოცდილება ადგილობრივ თემებთან კომუნიკაციის პროცესში.
„მიმაჩნია, რომ ენერგოპროექტების წარმატებით განხორციელებისთვის რამდენიმე ასპექტია უმნიშვნელოვანესი – კომპანიის წარმომადგენლების მუდმივი კომუნიკაცია ადგილობრივ მოსახლეობასთან და როგორც ცენტრალური, ასევე ადგილობრივი მთავრობის მხარდაჭერა. „შუახევიჰესის“ განვითარების სხვადასხვა ეტაპზე არაერთი გამოწვევის წინაშე ვიყავით. მიმაჩნია, რომ ჩვენი პროექტის წარმატებით განხორციელება ორმა ფაქტორმა მნიშვნელოვნად განსაზღვრა – ჩვენი, როგორც ინვესტორის მხრიდან,ყველა დაინტერესებული მხარის ჩართულობის უზრუნველყოფამ და საქართველოს მთავრობის მუდმივმა მხარდაჭერამ.
პროექტის განვითარების პირველივე ეტაპზევე ჩვენ გვქონდა მუდმივი კომუნიკაცია ადგილობრივ მოსახლეობასთან, დავაარსეთ საინფორმაციო ცენტრები, რომლებიც უზრუნველყოფდა ინფორმაციის მიწოდებას მოსახლეობისთვის, იმართებოდა მუდმივი შეხვედრები თითოეულ თემსა და სოფელში. ამავდროულად ვთავაზობდით სოციალურ პროექტებს, რომლებიც, როგორც რეგიონის, ასევე თითოეული ადგილობრივის ცხოვრების დონის ამაღლებას უწყობდა ხელს. გარდა ამისა, ყველა დაპირება, რაც ჩვენ მოსახლეობასთან პირველი შეხვედრების დროს გავეცით, ბოლომდე შევასრულეთ. ამან ნდობის მნიშვნელოვანი საფუძველი შექმნა ჩვენსა და ადგილობრივ მოსახლეობას შორის. შევქმენით 1000-ზე მეტი მაღალანაზღაურებადი სამუშაო ადგილი ადგილობრივებისთვის და განვახორციელეთ ასობით სოციალური პროექტი.
ჩვენი მხარდაჭერა ადგილობრივი მოსახლეობის მიმართ მხოლოდ მშენებლობის ეტაპით არ შემოფარგლულა: უკვე ოპერირების ეტაპზე, ჩვენ მაქსიმალურ შესაძლებლობას ვქმნით, რომ დავასაქმოთ ადგილობრივები და ამავდროულად ვაგრძელებთ სოციალური პროექტების განხორციელებას“, – განაცხადა რაკეშ ნაიკმა
ენერგეტიკულ კონფერენცია „Renewable Georgia 2022“
კონფერენცია გაიმართა ბრიტანული კომპანია „The Voice of Renewables“ ორგანიზებით და GREDA-ს მხარდაჭერით. ღონისძიების მიზანს ენერგეტიკის დარგის მხარდაჭერა წარმოადგენდა.
