რუსეთის დუმაში წარადგინეს კანონპროექტი, რომლის მიხედვითაც, რუსეთს შეუძლია თანამემამულედ აღიაროს ყველა, ვინც რუსულ ენას ფლობს. კანონპროექტი ასევე ითვალისწინებს რუსეთის ტერიტორიაზე ისტორიულად მცხოვრები ხალხების სიის დაზუსტებას. ინფორმაციას ამის შესახებ რუსეთის ცენტრალური სახელმწიფო საინფორმაციო სააგენტო TASS-ი ავრცელებს.
დუმის დსთ-ს [დამოუკიდებელ სახელმწიფოთა თანამეგობრობის] საქმეთა, ევრაზიული ინტეგრაციისა და თანამემამულეებთან ურთიერთობის კომიტეტის თავმჯდომარის პირველმა მოადგილემ კონსტანტინე ზატულინმა (ფრაქცია „ედინაია რასია“) პალატას წარუდგინა კანონპროექტი, რომელიც ითვალისწინებს თანამემამულეებად აღიარონ ყველა, ვინც რუსულად საუბრობს. დოკუმენტი დუმას ელექტრონულ მონაცემთა ბაზაში ორშაბათს განთავსდა.
როგორც განმარტებით დოკუმენტებშია აღნიშნული, „კანონპროექტი აღმოფხვრის ძირითადი ცნების/კონცეფციის – „თანამემამულეს“ არაგონივრულად ფართო ინტერპრეტაციის ნაკლოვანებებს.
კერძოდ, დუმისთვის შეთავაზებულია თანამემამულეებად აღიარონ ის პირები, რომლებიც „ფლობენ რუსულ ენას <…> და განეკუთვნებიან იმ ხალხებს, რომლებიც ისტორიულად ცხოვრობდნენ რუსეთის ტერიტორიაზე“, ასევე ის პირები, „რომელთა პირდაპირი წინაპრები დაიბადნენ ან ცხოვრობდნენ რუსეთის ფედერაციის ტერიტორიაზე“.
„ეს ითვალისწინებს იმას, რომ სსრკ-ს დაშლიდან გასული 30 წლის განმავლობაში გაიზარდა თანამემამულეების ახალი თაობა, რომლებსაც არ აქვთ სსრკ მოქალაქეობა. აქ ცნება – „თანამემამულეს“ განმარტებიდან გამორიცხულია სსრკ-ს მოქალაქეობასთან კავშირი“, – ნათქვამია თანდართულ მასალებში.
კანონპროექტი ასევე ითვალისწინებს რუსეთის ტერიტორიაზე ისტორიულად მცხოვრები ხალხების სიის დაზუსტებას. „კერძოდ, ამ სიაში შეყვანილია ბელორუსი და უკრაინელი ხალხების წარმომადგენლები, ასევე, მცირერიცხოვანი ძირძველი ხალხების წარმომადგენლები”, – წერს TASS-ი.
