უკრაინაზე თავდასხმის შემდეგ რუსეთის ბაზრიდან ევროპული და დასავლური ბრენდები ისევ გადიან. მათ სიას ამჯერად ნიდერლანდებში დაფუძნებული ლუდის კომპანია Heineken-იც შეუერთდა. სპეციალურ განცხადებაში კომპანიის ხელმძღვანელობა წერს, რომ დღეიდან რუსეთში ჩერდება Heineken-ის ლუდის წარმოება და რეალიზაცია.
Heineken-ის ბრენდის წარმოება, რეკლამა და გაყიდვა იქ დაუყოვნებლივ შეჩერდება, ნათქვამია კომპანიის განცხადებაში – “ჩვენ შოკირებული და დამწუხრებული ვართ უკრაინაში დატრიალებული ტრაგედიით… რუსეთის მთავრობების ომი უკრაინის წინააღმდეგ არის არაპროვოცირებული და სრულიად გაუმართლებელი თავდასხმა. „ჰეინეკენი” აჩერებს ლუდის წარმოებას და რეალიზაციას რუსეთში”.
სამშაბათს ასევე ცნობილი გახდა, რომ რუსეთის ბაზრიდან გასული უცხოური კომპანიების ტალღას ამერიკული ყავის სახლის ქსელი „სტარბაქსიც შეუერთდა“. ამის შესახებ Starbucks-ის აღმასრულებელი დირექტორის კევინ ჯონსონის განცხადებაში წერია, რომელიც კომპანიის ვებგვერდზე გამოქვეყნდა.
„ჩვენ ვგმობთ რუსეთის მიერ უკრაინაზე საზარელ თავდასხმებს. დღეს გადავწყვიტეთ შევაჩეროთ ყველა ბიზნესსაქმიანობა რუსეთში, Starbucks-ის ყველა პროდუქტის გადაზიდვის ჩათვლით,” – წერია განცხადებაში.
